Sejdiu: Të zbardhet atentati ndaj Rugovës

Ish-presidenti i Kosovës, Fatmir Sejdiu, njëherësh edhe kryetar nderi i LDK-së, ka thënë se duhet të zbardhen të gjitha vrasjet e pas luftës, ku më së shumti sipas tij kanë qenë të LDK-së.

Në një intervistë për “Epoka e re”, Sejdiu ka thënë se në kuadër të funksionimit të shtetit ligjor duhet të ndodh edhe zbardhja e viktimave të pas luftës që kanë qenë veprimtarë politikë.

“Kush i ka bërë ato vrasje është mirë të dihet. Kjo çështje duhet të zbardhet dhe të dihet se kush janë akterët për vrasjet e pasluftës, pavarësisht se cilit grup politik i përkasin e që në këtë rast LDK-ja ka pasur mjaft shumë. Pastaj të zbulohet se kush kanë qenë akterët e atentatit ndaj presidentit Rugova dhe shumë veprime të tjera”, ka thënë ish kryetari i LDK-së.

Sipas tij, kjo do të ishte satisfaksion jo vetëm për rrethin e ngushtë, por edhe për stabilitetin e përgjithshëm në vend.

“Unë për gati 5 vjet pune si president i vendit qasje themelore timen kam pasur se si të funksionoj më mirë shteti ligjor me të gjithë mekanizmat e tij. Nuk duhet të shikohen njerëzit si kundërshtarë përtej asaj shënjestrës së armës, por duhet të shikohen si rivalë apo konkurrentë politikë. Lufta politike e subjekteve duhet të bëhet nëpërmjet ideve dhe projekteve programore”, ka thënë Sejdiu. (ORAinfo)