S’e japim LDD-në

Lideri i Lidhjes Demokratike të Dardanisë, Nexhat Daci mohon mundësinë e shkrirjes e partisë së tij në ndonjë subjekt tjetër. Duke iu përgjigjur LDK-së, e cila njoftoi se dardanëve ua mori të mërkurën një degë në Deçan, Daci tha se po largohen vetëm individët. Por ish-kryeparlamentari shfaqet këmbëngulës duke thënë se emrin e LDD-së nuk mund ta marrë askush.

“Ka lëvizje prej Veriut në Jug, prej Amerikës Veriore në Afrikën e Jugut, po shihni çdo ditë lajme të vërteta ose ma pak të pavërteta, e vërteta është që ka lëvizje të individëve”, ka deklaruar Daci për “Express”.

“Po mashtrohen. Degën ose emrin e LDD-së nuk mundet me marrë me veti në xhep kurrkush se nuk janë kumbulla të atij dhe nuk qëndron fare. Unë e kam bërë me dije që shkrirja e LDD-së nuk është në konceptin e LDD-së, të gjitha organet kanë vendos unanimisht që LDD vazhdon”, ka shtuar Daci.

Lideri i dardanëve pohoi se është në bisedime me disa subjekte politike për bashkëpunim të mundshëm por se nuk ka asgjë konkrete me asnjërën.

“Ka biseda, ka edhe me LDK-në, po ka edhe me partnerë të tjerë që unë i kam përcaktuar si partnerë të mundshëm shpresoj që të përfundojmë me ndonjërin prej këtyre partnerëve, nuk e di unë tash. nuk e di tash ka burime të ndryshme, mirëpo asgjë konkrete nuk ka se po të kishte unë kisha deklaruar”, tha Daci.

Ai ka folur për lëvizjet e individëve nga partia e tij e që nuk janë të pakta.

“Mundem vetëm një gjë me thanë, kanë dalë në Ferizaj në zgjedhjet e përsëritura lokale dy- tre bajraktarë qashtu pa lejen e LDD-së dhe kanë marrë më pak vota se vetë LDD-ja që ka marrë. Jemi në demokraci dhe gjithkund ju po e shihni ka lëvizje edhe te gjitha subjektet, diku më pak diku më shumë”, tha lideri i LDD-së.

Ndryshe, kohë më parë Daci pati lënë të hapur edhe mundësinë e bashkëpunimit me AAK-në.

Ai pati thënë se në fund do të bisedave do të jenë tri parti në koalicion duke aluduar në AAK-në e Ramush Haradinajt dhe LDD-në. Këtë ide ai vazhdon ta ketë, por nuk po e bënë publike partinë e tretë.

“E ajo treta po del ma problematikja prej të gjithave, pro po e lëmë edhe një kohë pa e identifikuar se nuk më lejon as pozita as mosha me dalë me deklarata që nuk janë një qind për qind të sigurta”.