S’di çfarë thonë të tjerët, Serbia duhet ta njoh Kosovën

Kryetari i Parlamentit Evropian, Martin Schulz, mbetet pranë deklaratës së tij për nevojën e njohjes së ndërsjellë të Beogradit dhe Prishtinës, si kusht që Serbia të pranohet në Bashkimin Evropian, thuhet në një deklaratë për media të kryeparlamentarit evropian.

“Kryetari i Parlamentit Evropian nuk dëshiron të komentojë çfarë flasin të tjerët për këtë çështje. Në deklaratën e tij, zoti Schulz ka thënë atë që është e qartë. Kryetari e sheh fatin e Kosovës dhe të Serbisë si anëtare të ardhshme të Bashkimit Evropian”, citon Deutsche Welle sqarimin e kabinetit të Schulzit.

Schulz deklaratën e tij e bëri një ditë më parë pas takimit me kryeministrin e Serbisë, Ivica Dacic, ndërsa e përgënjeshtroi disa orë më vonë komesioneri evropian për zgjerimin Stefan Fule, duke saktësuar se nuk bëhet fjalë për nevojën e njohjes, por për normalizimin e raporteve me Kosovën.

Ka reaguar edhe nënkryetarja e Qeverisë së Serbisë, Suzana Grubjesic. Ajo ka vlerësur se nuk është e mirë që në këtë fazë të procesit Serbisë t’i vihen kushte të cilat, sipas saj, dihet se nuk mund të përmbushen.

Schulz është zyrtari i parë evropian, i cili e ka bërë të qartë se njohja e ndërsjellë e Serbisë dhe Kosovës nga njëra tjetra, është kushti kryesor për pranim në Bashkimin Evropian.