Schlumberger: OSBE-ja nuk veproi njëanshëm

Shefi i Misionit të OSBE-së në Kosovë, Ambasadori Jean-Claude Schlumberger, i ka hedhur poshtë akuzat e Zëvendëskryeministrit të Serbisë, Aleksandër Vuçiq për gjoja veprimeve të papërshtatshme dhe ndërhyrjes në vullnetin e votuesve në Mitrovicë të Veriut më 17 nëntor, transmeton KTV.

“OSBE-ja është duke i lehtësuar zgjedhjet lokale në veri të Kosovës në pajtim me marrëveshjen e 19 prillit. I hedh poshtë disa deklarime se kinse OSBE-ja ka vepruar njëanshëm dhe pa mandat kur ka transportuar materialin zgjedhor në QNR kjo nuk është e vërtetë. OSBE-ja ka dhënë rekomandimin e saj, ndërsa vendimin për t’i numëruar votat në QNR e ka marrë Komisioni Qendror i Zgjedhjeve në Prishtinë”, ka thënë shefi i OSBE-së.

Vuçiq ka paralajmëruar që Beogradi do të kërkojë nga Brukseli përgjigje se kush qëndron prapa vendimit që fletëvotimet e zgjedhjeve të përsëritura në Mitrovicë janë numëruar jashtë Mitrovicës.