Salzburg – Talenti kosovar, Zymer Bytyqi, ka firmosur kontratë trevjeçare me skuadrën kampione të Austrisë, Red Bull Salzburg. Këtë e ka bërë të ditur uebfaqja zyrtare e skuadrës së madhe austriake. Bytyqi 15-vjeçar do t’i bashkohet Salzburgut më 1 janar të vitit 2013.
“Jemi shumë të lumtur që kemi angazhuar një talent të madh. Ai ka potencial shumë të madh dhe ne duam ta zhvillojmë më tutje me synim që ta angazhojmë në skuadrën profesioniste për një kohë të gjatë”, ka thënë drejtori sportiv i Red Bull Salzburgut, Ralf Rangnick.
Bytyqi në radhët e Red Bullit është transferuar nga skuadra e elitës norvegjeze Sandnes. Ai me Sandnesin ka debutuar këtë edicion në elitën e futbollit norvegjez, ku ka luajtur katër herë, duke u bërë lojtari më i ri që është paraqitur ndonjëherë në Kategorinë e Parë të Norvegjisë, shkruan gjerësisht sot “Koha Ditore”.
