Salihu: Nga sonte fillon ora për të ndryshuar të ardhmen e Kosovës

Gjilan – Në takimin që mbajti shtabi zgjedhor i AKR-së dega në Gjilan mbajtur u raportua gjendja e përgjithshme e strukturave të AKR-së përfshirë të gjitha nëndegët, forumi Gruas dhe forumi Rinor. Shefi i shtabit të AKR-së në Gjilan Vehbi Salihu tha para të pranishmëve se tani orët janë afruar për hapjen e fushatës zgjedhore edhe zyrtarisht.

“Tani orët janë afruar për hapjen e fushatës zgjedhore edhe zyrtarisht. Koha për të ndryshuar vendin dhe të ardhmen e Kosovës fillon sonte nga ora 00:00 edhe zyrtarisht. Nga kjo orë e tutje qytetarët e Gjilan dhe Kosovës dhe simpatizantët e AKR-së dhe të koalicionit do të fillojnë të kërkojnë votën e kthesës historike te Kosovës. E kemi pritur këtë ditë të rëndësishme, ditë e sovranit, ku populli do të vendos fatin dhe të ardhmen e vendit. Lusim të gjitha strukturat tona të AKR-së gjithashtu qytetarët e Gjilan dhe gjithë Kosovës qe të jenë të gatshëm për orën e ndryshimeve që po vije. Në emër të AKR-së në cilësinë e shefit të shtabit ju uroj ju të pranishëm dhe gjithë qytetarëve të Anamoravës dhe Kosovës këto zgjedhje historike” tha Salihu.

AKR në Gjilan sipas zëdhënësit të shtabit Sami Spahiu, bënë thirrje që në këto zgjedhje të përkrahet programi i koalicionit LDK –AKR nga qytetarët e Anamoravës duke ju përgjigjur masovisht këtyre zgjedhjeve të 11 qershorit.

Në këtë takim u diskutuan edhe përgatitjet e fundit teknike për fushat sa më të dinjitetshme, duke udhëzuar të gjithë përgjegjësit për zbatimin e detyrave sipas planit të paraparë./rajonipress/