Salihu jep dorëheqje nga KOK-u, paralajmëron protestë

Ashtu siç kishte paralajmëruar edhe më herët, legjenda e boksit kosovar, Aziz Salihu ka dhënë dorëheqje nga posti i nënkryetarit të parë të Komitetit Olimpik të Kosovës (KOK).

Arsyeja kryesore që e ka shtyrë Salihun të bëjë një gjë të tillë ka qenë dështimi i pjesëmarrjes së sportistëve kosovarë në Lojërat Olimpike Londra 2012 e në veçanti dështimi i Majlinda Kelmendit, për të cilën tha se është mëkat se si nuk do ta përfaqësojë Kosovën në Londër.

“Po jap dorëheqje nga posti i nënkryetarit të parë të KOK-ut dhe arsyeja e vetme është mospjesëmarrja e sportistëve kosovarë në Lojërat Olimpike e në veçanti mospjesëmarrja e Majlinda Kelmendit”, tha Salihu në një konferencë për media të martën.

Mirëpo, ai ka thënë se edhe pse ka dhënë dorëheqje, nuk do të ndalet, por do të vazhdojë të punojë edhe më shumë për ndërkombëtarizimin e sportit kosovar. Ai premtoi se shumë shpejt do të organizojë një protestë më sportistët kosovarë për t’i treguar botës që vendimi për të mos lejuar pjesëmarrjen në Olimpiadë ka qenë i gabuar.

Shpërndaje.
© RAJONIPRESS