Rugova vepronte, si një filozof

Në shtatë vjetorin e vdekjes së ish-presidentit të Kosovës, Ibrahim Rugova, lideri i aktual i LDK-së, Isa Mustafa, ka vlerësuar lartë figurën e ish-presidentit Rugova, duke thënë se ai ishte lideri që vulosi fundshekullin e kaluar dhe këtë fillim shekull me konkretizimin e pavarësisë së Kosovë.

Mustafa këto komente i ka bërë sot derisa sa ka vizituar familjen Rugova.

“LDK e çmon shumë lartë figurën dhe personalitetin e presidentit Rugova edhe si kryetar të LDK-së, edhe si president i vendit. Si një filozof i cili e zhvilloi një aktivitet dhe një lëvizje të veçantë në një periudhe kur ishte shumë vështirë të lëvizej për liri, pavarësi dhe demokraci, lider i cili e vulosi fundshekullin e kaluar dhe fillimin e shekullit të ri dhe të arritëm që Kosovë ta pavarësojmë që Kosova të ec drejtë integrimeve evropiane dhe euro- atlantike, kërkesë e tij e kamotshme”, ka thënë Mustafa.

Shtatë vjet nga vdekja e ish-presidentit, Ibrahim Rugova

Sot mbushen 7 vjet nga vdekja e ish-Presidentit të Republikës së Kosovës, Ibrahim Rugova.

Në përkujtim të tij, sot përfaqësues të institucioneve dhe partive politike do të bëjnë homazhe pranë varrit të tij në Velani si dhe janë paralajmëruar të mbahen dy akademi përkujtimore, njëra e organizuar nga presidentja e Kosovës, Atifete Jahjaga, e cila do të mbahet në orën 11:00 dhe tjetra nga Lidhja Demokratike e Kosovës, të cila do të mbahet në orën 13:00.(express)