Ruane identitetin rugovian, legalizoni flamurin dardan!

Nga Arbër R. Ismajli – Tani më duket se koalicionet në Kosovë në vete bartin sakrificë dhe hise të dhimbjes e tërë kjo nga e kaluara goxha e acaruar në mes dy partive që edhe bartin gjithë barrën e zhvillimeve brenda koloritit politik në vendin tonë. Historiku flet se pas çdo kurorëzimi të afrimeve politike në mes të LDK e PDK, fillon elektrizimi i elektoratit, e tani më pas votimit të Thaçit për president, ajo duket se ka arritur të thyej ndoshta edhe parashikimet e analistëve të cilët siç duket fare pak dhanë mesazhe se si do behet situata tek tabori rugovian pas zgjedhjes së Thaçit.

Duhet kuptuar që as gjë s`fillon për një ditë, as lufta për lirinë e Kosovës nuk u bë për një ditë, po as fillet e kësaj lirie si bëmë ne, para nesh ishin shumë të tjerë që na mundësuan që sot të jetojmë atë të lumturën pavarësi. Kosova e vuajtjeve ndoshta e mësuar që çdo gjeneratë e saj të ballafaqohet me probleme që barten nga brezi në brez. Tani më kur po afrohen dy dekada që kur po shijojmë lirinë e arritur me shumë mund dhe sakrificë si dhe tetë vite shtet e që janë shumë e më shume vite që ne kërkojmë të mos na humbet identiteti ynë kombëtar.

Lirisë sonë i parapriu një luftë diplomatike shumë vjeçare të cilën e udhëhoqi me shumë sukses Presidenti i parë dhe themeluesi i shtetit të Kosovës Dr.Ibrahim Rugova. Tani më pas lidhjes së koalicionit në mes partisë së Presidentit Rugova dhe PDK së Hashim Thaçit, duke se i ka ardhur koha edhe kërkesës për institucionalizimin e flamurit të propozuar nga Presidenti Rugova e që njëkohësisht është edhe vulë e Presidentit të Kosovës e që nga data 8 mars me të do të udhëheq tani më Presidenti i ri Thaçi, si i ardhur në këtë pozitë nga marrëveshja e mëhershme në mes dy subjekteve më të mëdha.
Me që jemi në rrugë të formimit apo forcimit si shtet, etapë kjo që në vete bartë edhe momente lëndimi tek militantet e njërës apo palës tjetër, por tani më nuk dihet se kujt i takon barra e inicimit të harmonizimit të raporteve në mes elektoratit të partive që qeverisin me Kosovën. Akoma e freskët është dita kur në krye të shtetit erdhi Presidentja Jahjaga, për të mos thënë se ajo më shumë u pranua si kukull se sa si e para e vendit, edhe reagimet ishin jo aq të forta ngase marr për bazë forcën e saj politike nuk shihej sherr politik nga ajo.

Sot është edhe momenti të reflektojmë bardhë, kur dy paritë e taboreve që konsideroheshin rivale gjetën harmoni, por me çka mundë të reflektojmë dhe të fillojmë për së mbari? Të fillojmë me zyrtarizimin apo kthimin tek rrënjët me legalizimin e flamurit dhe himnit të propozuar nga themeluesi i shtetit Presidenti Rugova, kjo besoj do të ulë gjakrat ngase s’paku do arrihej që ulësja e Presidentit të filloj të jap mesazhe uniteti, detyrë kjo kryesore qe i takon të parit të shtetit por edhe borxh moral i LDK-së, ndaj themeluesit të shtetit të Kosovës dhe ndaj gjeneratave të reja, ata duhet mësuar ta duan flamurin pra një flamur me të cilin identifikohen. Propozimin e tillë e bëjë duke njohur mirë elektoratin rugovian dhe me besim që edhe kryesia e LDK-së do ta shohë si rrugë që edhe në të ardhmen të kemi të drejtë të mbajmë si simbol identitetin rugovian atëherë e vetmja zgjidhje ka mbetur kjo.

(Autori është shef i kabinetit të Lutfi Hazirit dhe anëtar i kryesisë në degën e LDK-së, në Gjilan)