Rrugën milionëshe nuk e mirëmban askush

Gjilan – Në rrugën Pograxhë- Dobrosin – Stublinë që lidhen dhjetëra fshatra shqiptare andej e këndej kufirit edhe pse janë investuar mbi 1.3 milion euro, kjo rrugë vazhdon të mbetet nën mëshirën e zotit, meqë as Komuna e Gjilanit e as Ministria e Infrastrukturës nuk kujdesen për mirëmbajtjen e saj.

Rruga Pograxhë-Stublinë-Dobrosin e gjatë gjashtë kilometra e quajtur si rruga e shpresës dhe e bashkimit të dhjetëra fshatrave shqiptare andej dhe këndej kufirit tanimë ka mbetur nën mëshirën e zotit. Kjo rrugë ka kushtuar mbi 1 milion e 300 mijë euro dhe është investim i Ministrisë së Transporteve.

Rruga kishte gëzuar tej mase banorët e brezit kufitar. Me asfaltimin e kësaj rruge tashmë janë lidhur edhe fizikisht fshatrat shqiptare me Kosovën, sidomos Dobrosini, Lluqani, Verbani, Nasalca, Cerretica, etj e shumë fshatra tjera që tashmë e kanë më të lehtë edhe komunikimin , por edhe shërbimet mjekësore.

Por kjo rrugë që gjatë kohës së mërgimtarëve krijon shumë qarkullim nuk mirëmbahet nga askush. Rruga ka filluar të dëmtohet për shkak të shembjes së gurëve e dheut. Kur rruga bllokohet janë banorët e Stublinës dhe Dobrosinit ata që përkujdesen për hapjen e saj.

Behar Mehmeti drejtor i shërbimeve publike tha për rajonipress se realisht rrugën Pograxhë- Stublinë – Dobrosin nuk e mirëmban as ministria e as komuna. “Ministria zyrtarisht nuk ka marrë obligime dhe nuk e ka definuar me kohë përgjegjësin për këtë rrugë. Ndryshe po të definohej rruga komuna e Gjilanit ashtu siç e ka mirëmbajtur mirëmbajtjen dimërore njëjtë do të veprojë edhe me mirëmbajtjen verore” tha Mehmeti.

Sipas Mehmetit , Komuna e Gjilanit disa herë ka bërë kërkesë që kjo rrugë të definohet nga ana e Ministrisë së Infrastrukturës, por kjo e fundit asnjë përgjigje me shkrim nuk e ka sjellur tek zyrtarët e Gjilanit sqaroj Mehmeti.

Por tjetër version jep Isa Berisha koordinator i rrugëve rajonale në Ministrin e Infrastrukturës. Berisha i kontaktuar nga rajonipress tha se rruga Pograxhë – Dobrosin është në kompetencë të Komunës së Gjilanit dhe asnjëherë nuk ka qenë në kuadër të Ministrisë. Ne i mirëmbajmë vetëm rrugët magjistrale” tha shkurt Berisha.

Ndryshe kjo rrugë vazhdon të mirëmbahet kohë pas kohe nga vet banorët e Stublinës (Kosovë) dhe të Dobrosinit (Serbi). Mehmetali Sadriu përfaqësues i bashkësisë lokale në Dobrosin tha se po të mos ishin organizimet e kohëpaskohshme ku banorët vet participojnë me punë vullnetare për të larguar pengesat dhe shembjen e dheut nga rruga, kjo rrugë do të mbyllej e tëra.

Edhe banorët e Stublinës ndihen të shqetësuar që rruga e cila ka kushtuar mbi 1 . 3 milion euro nuk mirëmbahet nga askush. Zymer Osmani banor nga Stublina thotë se rruga Pograxhë- Stublinë- Dobrosin është shumë e frekuentuar dhe ajo ka nevojë për një mirëmbajtje të rregullt. “Asnjëherë asnjë punëtor zyrtar i Ministrisë së Infrastrukturës nuk e ka vizituar këtë rrugë edhe pse është investim i tyre. Ne vet po mundohemi ta pastrojmë rrugën nga shembja e gurëve, por kjo punë realisht është pjesë e Ministrisë së Infrastrukturës ose e organeve komunale të Gjilanit tha Osmani. /rajonipress/