Ndarja e posteve të “mëdha” ndërmjet dy liderëve oponentë, Hashim Thaçit dhe Ramush Haradinajt, që ky i fundit të drejtojë qeverinë e Thaçi të bëhet president, duket se do të jetë një mision i pamundur dhe një kalkulim i bërë keq.
Të paktën do të duket i pamundur për Kryeministrin Hashim Thaçi, sepse lëvizja e tij drejt Presidencës do të jetë “një fushë e minuar” e cila do të kalohet më shpejt se gjashtë muaj minimum. Madje gjashtë muaj janë nëse Kuvendi i Kosovës menjëherë pas festave të fundvitit e miraton reformën zgjedhore dhe kushtetuese.
Kryetari i Komisionit për Ndryshime Kushtetuese, Arsim Bajrami, ka thënë pa marrë parasysh ecuritë e debateve politike, të gjitha procedurat eventuale, çfarëdo ndryshime në qeveri, qoftë rikonfigurim apo diçka tjetër, duhet të respektohen procedurat kushtetuese, shkruan “Zëri”.
“Kushtetuta shumë mirë e ka përcaktuar se në cilat raste bëhet ndryshimi i qeverisë sa i përket pozitës së kryeministrit, gjithashtu dispozitat janë shumë të qarta sa i përket pozitës pozitës së presidentit. E vetmja mundësi eventuale që në këtë situatë t’i ndërpritet mandati presidencës është deklarata e saj për dorëheqje nga pozita e saj. Por, kjo nuk do të nënkuptonte mosushtrimin e funksionit nëse vendi do të shkonte në krizë parlamentare”, ka thënë Bajrami.
