“Rruga e Prishtinës”, simbol i premtimeve të pambajtura, çfarë do t’u premtojë sërish Kurti gjilanasve?

Gjilan – Një nga arteriet më të rëndësishme rrugore për qytetin e Gjilanit, hyrja dhe dalja në drejtim të Prishtinës, vazhdon të mbetet e papërfunduar edhe pas gjashtë vitesh, duke u kthyer në simbol të qartë të premtimeve të pambajtura dhe mungesës së investimeve serioze nga niveli qendror.

E njohur si “Rruga e Prishtinës” apo segmenti i Pasjakit, kjo pjesë strategjike infrastrukturore jo vetëm që nuk është përfunduar, por sot paraqet rrezik real për qarkullimin. Puseta të hapura, kanale të papërfunduara dhe mungesë e ndërhyrjeve konkrete e kanë shndërruar këtë hyrje të qytetit në një pamje alarmante për qytetarët dhe vizitorët.

Projekti, i nisur vite më parë, ka mbetur në gjysmë, ndërsa Qeveria aktuale e udhëhequr nga Albin Kurti, sipas qytetarëve dhe njohësve të zhvillimeve lokale, nuk ka sjellë asnjë projekt madhor në Gjilan dhe rajonin e Anamoravës. Kjo ka rritur ndjeshëm zhgënjimin publik, sidomos në prag të zhvillimeve të reja politike dhe zgjedhore.

Banorët e zonës nuk e fshehin pakënaqësinë. Ata e cilësojnë situatën si rezultat të neglizhencës institucionale dhe mungesës së vullnetit politik për të përfunduar një projekt jetik për qytetin.

“Rruga në hyrje të Gjilanit është pasqyrë e dështimit institucional. Është e papranueshme që një projekt i tillë të mbetet pezull për vite të tëra,” thotë një banor i zonës.

Edhe qytetarë të tjerë theksojnë se gjendja aktuale ka kaluar kufijtë e tolerueshëm, duke rrezikuar përditë sigurinë e pjesëmarrësve në trafik dhe duke penguar zhvillimin normal ekonomik të qytetit.

Në këtë kontekst, shtrohet pyetja që po artikulohet gjithnjë e më shpesh në opinionin publik: cili do të jetë premtimi i radhës i kryeministrit Kurti për Gjilanin, në një kohë kur projektet ekzistuese mbeten të papërfunduara?

Për qytetarët e Gjilanit, “Rruga e Prishtinës” nuk është më vetëm një problem infrastrukture, por një simbol i qartë i një qasjeje të munguar zhvillimore, një projekt i nisur, i lënë në harresë dhe ende në pritje të veprimit konkret./rajonipress/