“Rruga e Prishtinës” në Gjilan, ende e papërfunduar, hyrja kryesore e qytetit në gjendje alarmante

Gjilan – Hyrja dhe dalja kryesore e Gjilanit në drejtim të Prishtinës, e njohur ndryshe si rruga e Pasjakit, vazhdon të mbetet në gjendje të rëndë infrastrukturore, duke u shndërruar në një nga problemet më shqetësuese për qytetarët dhe drejtuesit e automjeteve.

Pavarësisht se projekti për rregullimin e kësaj rruge kishte nisur në kohën e Qeverisë Hoti, ai nuk është finalizuar as sot, ndërsa Qeveria aktuale e udhëhequr nga Albin Kurti nuk ka ndërmarrë asnjë hap konkret për vazhdimin apo përfundimin e punimeve.

Aktualisht, në këtë segment rrugor kanë mbetur vetëm disa puseta të hapura dhe kanale të ekspozuara për nevojat e kanalizimit, ndërsa pjesa tjetër e projektit ka mbetur e paprekur, duke krijuar pamje të shkreta dhe rrezik potencial për qarkullimin.

Banorët e zonës shprehin pakënaqësinë e tyre, duke e cilësuar situatën si pasojë të neglizhencës institucionale, si në nivel qendror ashtu edhe lokal.

“Rruga në hyrje dhe dalje të Gjilanit në drejtim të Prishtinës është pasqyrë e mjerimit institucional dhe e paaftësisë së pushtetit qendror e lokal për ta realizuar një projekt jetik për qytetin,” u shpreh Murati, banor i zonës përreth.

Pakënaqësi shprehin edhe qytetarë të tjerë, të cilët theksojnë se gjendja aktuale e rrugës po rrezikon sigurinë e pjesëmarrësve në trafik.

“Rruga aktuale krijon pasiguri serioze për vozitësit dhe kalimtarët. Është urgjente të rregullohet. Ne kemi pasur pritje për ndryshim, por zhgënjimi është i madh,” tha Mehmeti, një tjetër qytetar i Gjilanit.

Për qytetarët, kjo rrugë nuk është vetëm një segment infrastrukture, por arteria kryesore që lidh Gjilanin me kryeqytetin, ndaj zvarritja e punimeve shihet si pengesë për zhvillimin ekonomik, qarkullimin dhe imazhin e qytetit.

Derisa institucionet përgjegjëse nuk kanë dhënë ende një afat apo sqarim zyrtar për fatin e projektit, “Rruga e Prishtinës” vazhdon të mbetet simbol i një projekti të nisur e të harruar – në pritje të veprimit konkret./rajonipress/