Rroga e 13-të mobilizon sindikatat e ndërmarrjeve publike, paralajmërohen protesta

Ndarja e pagës së 13-të për zyrtarët publik por jo edhe për punonjësit e ndërmarrjeve publike, ka aktivizuar sindikatat, që kanë listuar kërkesat e tyre për institucionet e nivelit qëndror. Gjithashtu, janë paralajmëruar edhe protesta e greva.

Fillimisht kërkesat ua drejtuan veç me shkrim.

Por kur s’morën përgjigje tash po i japin zë padrejtësisë që pretendojnë se iu bë.

Sindikata e Re e punëtorëve të Korporatës Energjetike të Kosovës të enjten mbajti konferencë para qeverisë duke kërkuar ekzekutimin e pagës së 13-të edhe për ta.

“Punëtorët e Koorporatës Energjetike të Kosovës janë revoltuar për shkak se na kanë anashkaluar, punëtorët të cilët japin energjinë e bëjnë shtetin të punojë me energji në mënyrë që shteti janë të funksionojë sa më mirë”, ka thënë Xhelal Jashari, kryetar i Sindikata e Re e punëtorëve të KEK-ut.

Kritik ndaj qasjes së qeverisë qe edhe nënkryetari i kësaj sindikate, Nexhat Llumnica.

“Këta ose e komentojnë ligjin sipas dëshirës ose me të vërtetë janë të padijshëm sepse t’i thuash një veterani që punonë në KEK nuk të takon paga e 13-të edhe pse je ndërmarrje publike vetëm këtu ndodh”, ka thënë Llumnica.

Qeveria miraton pagën e 13-të për sektorin publik

Rrogën e 13-të po e kërkojnë edhe Sindikata e Punëtorëve të Postës së Kosovës.

“Ne me 1 mars ju kemi drejtu menaxhmentit dhe bordit me kërkesë, kemi kërku nga bordi dhe menaxhmenti të përdorin autoritetin ndaj ministrisë që të mos ndahemi ne nga ajo pjesë qe e kanë marrë rrogën e 13-të”, ka thënë Bujar Shala.

Me të njëjtën kërkesë e kritikë, qeverisë iu drejtuan edhe Sindikata e Pavarur e Minatorëve të Trepçës.

Përmes një reagimi publik ata kërkuan që qeveria të marrin parasysh kërkesat e tyre para masave sindikale.

Por, pagat, sipas ligjit ndërmarrjet publike i kanë nën vetëfinancim andaj për të arritur këtë kërkesë ekziston vetëm një mundësi.

“Ndërmarrjet publike vetëfinancohen domethënë ato duhet të kujdesën vet për ndarjen e pagave, të njëjtat munden me ju drejtu kuvendit për ndryshimin e ligjit të pagave për ndërmarrjet publike me ndonjë peticion të përbashkët…”, ka thënë Naim Jakaj nga IKD.

Sindikatat e punëtorëve të ndërmarrjeve publike iu kanë drejtuar me ankesë edhe Institucionit të Avokatit të Popullit, e janë paralajmëruar edhe protesta e greva të përgjithshme./TV Dukagjini