Rritet numri i rasteve sociale në Gjilan

Gjilan – Mursel Zymberi drejtor i qendrës për punë sociale thotë për rajonipress se numri i familjeve gjilanase që kërkojnë ndihma sociale është në rritje. Zymberi thotë se ndihma që marrin këto familje është e ulët dhe nuk përmbush kërkesat familjare. Rastet sociale kryesisht dominohen nga viset rurale dhe lagjet në qytet.

Numri i rasteve sociale në Gjilan po vije e po rritet çdo ditë. Paga e ulët që marrin nga shteti për këto familje është e ulët dhe e papërballueshme ndërkohë papunësia është elementi kryesor që këto raste shtohen thonë zyrtarët komunal në qendrën për punë sociale në Gjilan raporton rajonipress.

Mursel Zymberi drejtor i qendrës për punë sociale thotë për rajonipress se numri i shfrytëzuesve të ndihmave sociale në Gjilan arrin në 1169 familje me 4704 anëtar. Nga kjo shifër 1120 familje ose 4526 anëtar janë shqiptarë, 24 familje me 87 anëtar janë serb dhe 25 familje me 91 anëtar janë romë. Në skemën e ndihmave nuk figuron asnjë nga komuniteti turk.

Zymberi tha se rreth 86300 euro është buxheti mujor që shpenzohet për këto familje. Jashtë këtyre ndihmave të rregullta që marrin nga shteti këto familje Qendra për Punës Sociale (QPS) sipas Zymberit ndihmon për çdo festë kombëtare familjet me nevojë duke ofruar dhe shpërndarë dhurata dhe paketa ushqimore dhe veshmbathje. “Kemi pasur donacioni nga KFOR-i turk për disa familje të rrezikuara dhe kemi shpërndarë paketa nga donatorët e tjerë”.

Zymberi tha se familjet që kërkojnë ose që janë përfitues të ndihmave sociale kryesisht dominohen nga viset rurale, brezi kufitar dhe lagjet e mëdha në qytet. Gjithashtu QPS kompenson edhe 187 familje me nga 100 euro që kanë fëmijë me aftësi të kufizuara, derisa 37 fëmijë që janë nën kujdestari marrin nga 75 euro dhe 21 fëmijë marrin ndihma për strehim familjar.

Zymberi thotë se gjendja sociale e familjeve gjilanase po vije duk u bërë e rëndë. “Edhe këto familje që marrin ndihmat e rregullta nuk mund ta përballojnë muajin pasiqë paga është e ulët. Nuk pritet të ketë përmirësim në këtë drejtim edhe për një kohë të gjatë sepse numri i të papunëve që llogaritet shkaktari kryesor që krijohen rastet sociale po vije gjithnjë duke u rritur” tha Zymberi./rajonipress/