“Rrëzohet” Mustafa, vendi drejt zgjedhjeve

Kushtetuesja ka thënë se vendimi i 17 korrikut të këtij viti është jokushtetues, si nga procedura e ndjekur, ashtu edhe për nga përmbajtja, pasi nuk ishte grupi më i madh parlamentar ai që propozoi kryetarin e Kuvendit dhe rrjedhimisht është i pavlefshëm.

Gjykata Kushtetuese e Kosovës ka pranuar kërkesën e PDK-së, dhe me shumicë votash ka vendosur që në mbledhjen dhe procedurën e ndjekur pas pezullimit të seancës konstitutive, më 17 korrik 2014, për shkak të mungesës së kuorumit, është shkelur Neni 67 (2) në lidhje me Nenin 64 (1) dhe si të tillë e ka shpallur jokushtetues zgjedhjen e Isa Mustafës kryetar të Kuvendit dhe atë të Glauk Konjufcës dhe Duda Balje, nënkryetarë.

Kushtetuesja ka thënë se vendimi i 17 korrikut të këtij viti është jokushtetues, si nga procedura e ndjekur, ashtu edhe për nga përmbajtja, pasi nuk ishte grupi më i madh parlamentar ai që propozoi kryetarin e Kuvendit dhe rrjedhimisht është i pavlefshëm.

Vendimi i Kushtetueses tani e ka kthyer situatën në pikën zero. Derisa lideri i PDK-së, ka thënë se ky vendim i hap rrugë implementimit të “Misionit të Ri”, kreu i LDK-së Isa Mustafa ka shtuar se kjo nuk është as humbje as fitore për njërën apo tjetrën palë.

Në anën tjetër, ekspertët e Kushtetutës thonë se ky vendim i Gjykatës, mund ta dërgojë vendin në zgjedhje të jashtëzakonshme./zeri/