Rrahman Jasharaj thotë se viti i ri shkollor do nisë sipas planit të paraparë

Kryetari i SBASHK-ut, Rrahman Jasharaj ka thënë se viti i ri shkollor do të nis sipas planit të paraparë.

Megjithatë ai la të kuptojë se mund të ketë hapa tutje në lidhje me krijimin e kushteve për dialog sa i përket kërkesave të tyre.

“Për t’i ikur grevave e protestave dhe për t’i dhënë hapësirë dialogut ne kemi filluar dhe jemi të angazhuar që të mbajmë takime me të gjithë ata që ndikojnë në krijimin e kushteve për dialog”, deklaroi Jasharaj për transmetuesin publik të Kosovës, teksa shtoi se u kanë dërguar shkresa të gjithë shefave të grupeve parlamentare të partive politike.

Por, ai pati kritika për ministren e Arsimit, Arbërie Nagavci, për siç thotë shmangien e takimeve me SBASHK-un që nga viti 2022, duke shkaktuar rritjen e pakënaqësisë te punëtorët e arsimit.

Sipas Jasharajt, nëse kërkesat e SBASHK-ut heshten, atëherë mbetet që Këshilli Drejtues, si organ më i lartë i sindikatës, të marrë nisma për të vepruar më tutje, sipas ligjeve në fuqi për veprime sindikale.