Ronaldo: Jam më i mirë se Messi

Ylli i Real Madridit, Cristiano Ronaldo, ka thënë se ai është lodhur nga krahasimet me yllin e Barcelonës, Lionel Messi, pasi mendon se ata nuk mund të vendosen përballë njëri – tjetrit për shkak të dallimeve mes tyre.

“Ndonjëherë kjo më lodh. Edhe atë po ashtu pasi njerëzit na krahasojnë neve gjithë kohën. Ju nuk mund të krahasoni Ferrarin me një Porsche pasi është makinë tjetër. Ju nuk mund t’i krahasoni ato”.

“Është mrekulli. Si për të po ashtu edhe për mua pasi ne kemi thyer rekordet tona, andaj është mrekulli të mendoj se ne e nxisim njëri-tjetrin në garë, kjo është arsyeja se pse ky krahasim është aq i madh. Kjo është arsyeja se pse Real Madridi dhe Barcelona janë skuadra të mëdha në botë, pasi secila e nxit tjetrën”.

“Nuk është fjala se kush është më i mirë. Thjesht nuk më pëlqen të krahasohem me askënd. Disa thonë se unë jam më i mirë, të tjerët thonë ai, por në fund të fundit ata vendosin se kush është më i mirë për momentin, që mendoj se jam unë”, ka thënë Ronaldo për CNN World Sport.

Ronaldo ka shënuar 46 gola në La Liga këtë sezon duke fituar edhe titullin e kampionit të Spanjës, derisa Messi ka shënuar 50 për të fituar trofeun Pichichi. /Telegrafi/