Rogana nderon bijtë e saj, përurohen bustet e Metush Krasniqi dhe Sejdi Kryeziu, simbole të sakrificës për liri

Kamenicë – Në Roganë të Kamenicës është zhvilluar sot një ceremoni solemne për përurimin e busteve të heronjve Metush Krasniqi dhe Sejdi Kryeziu, në nderim të jetës dhe kontributit të tyre për lirinë dhe atdheun.

Ceremonia u mbajt në një atmosferë dinjitoze, ku përfaqësues institucionalë dhe familjarë sollën mesazhe përkujtimore dhe frymëzuese për figurat e nderuara. Të pranishmëve iu drejtuan me fjalë rasti Arta Bajralija, nënkryetare e komunës, Shefik Sadiku, si dhe familjarët Teuta Krasniqi dhe Emira Kryeziu, të cilët ndanë kujtime dhe vlerësime për jetën dhe veprën e tyre.

Programi artistik i realizuar nga nxënësit e shkollave i dha aktivitetit një dimension të veçantë emocional, përmes interpretimit të këngës “Pa bashkim nuk ka fuqi” dhe recitimit “Jam Shqiptar e Kosovar”.

Në përmbyllje, u bë zbulimi i busteve dhe vendosja e kurorave me lule, si shenjë nderimi dhe mirënjohjeje të përhershme për kontributin e heronjve në historinë e vendit./rajonipress/