Rocky i Parteshit

Kryetari i Komunës së Parteshit, Nenad Cvetkovic, e ka bërë për spital Zoran Stojkovicin. Ai e goditi të riun me grushte e shqelma në zyrën e tij, duke i shkaktuar lëndime serioze në kokë dhe vesh. Gjithçka filloi pasi në një emision televiziv Stojkovic akuzoi kryetarin se nuk ka bërë asgjë për rininë e Parteshit.

Shkoi në zyrë të kryetarit, por hëngri disa grushte në kokë. Zoran Stojkovic nga Parteshi pretendon se hëngri dajak nga i pari i komunës, Nenad Cvetkovic. Të hënën atij iu desh të kërkojë edhe ndihmën e mjekut. Mori bajagi do plagë në kokë, por edhe në vesh. Krejt këto thotë se ia shkaktoi Cvetkoviqi, i cili e rrahu para të gjithë punëtorëve të komunës me boksa e shkelma. 25 vjeçari kërkoi ndihmën e mjekut në spitalin rajonal të Gjilanit dhe rasti u paraqit edhe në polici. Për të gjitha këto ai thotë se ka dëshmitarë, por edhe raportin mjekësor të cilin i është lëshuar nga spitali rajonal i Gjilanit.

Në raportin mjekësor të cilin e posedon Express shkruan se pacienti ka ënjtje në kokë, që supozohet se janë shkaktuar nga të goditurat. Po ashtu në këtë raport shkruan se pacienti ka disa gërvishtje në gishta. Pacienti është vizituar edhe nga psikiatri dhe është rekomanduar që të kontrollohet edhe nga otorinolaringologu, pasi ka dhimbje në veshin e djathtë.

“Kam bërë incizimin e kokës, kam qenë edhe te psikologu dhe më duhet të bëj edhe analiza të tjera, sepse nuk po dëgjoj mirë në njërin vesh”, tha Stojkovic.

E krejt kjo sipas Zoranit ka ndodhur për shkak të një kundërshtimi që ia kishte bërë kryetarit Cvetkovic në një emision të drejtpërdrejtë televiziv në të cilin flitej për të arriturat e komunës dhe investimet për rininë. Duke dëgjuar kryetarin tek numëronte “sukseset” e tij, Zoranit s`iu durua dhe e kundërshtoi atë.

“Krejt kjo ka filluar kur në një emision të drejtpërdrejtë e kam kritikuar kryetarin se nuk ka bërë asgjë për rininë e kësaj pjese”, ka rrëfyer Zorani për Express.