Rishikim për FSK-në

Ministri i Forcës së Sigurisë. Agim Çeku, ka thënë se kjo forcë është në proces të përcaktimit të misionit të vetë. Ai ka thënë se, sipas Pakos së Ahtisarit dhe ligjeve që janë nxjerrë, FSK-ja është limituar në detyra, në mision, në mandate, në pajisje, në numër dhe në strukturë.

Në këtë kontekst, ai ka thënë se deri në fund të këtij vit do të ndodhë një proces i rishikimit të FSK-së. “Pas rishikimit FSK-ja do të ketë ndryshime, do të ketë mandat të ri, i cili aktualisht i mungon. Procesi i rishikimit përfundon në fund të këtij viti dhe ne atëherë do të dalim me rekomandime, të cilat duhet t’i aprovojë Qeveria, pastaj edhe Kuvendi i Republikës së Kosovës”, ka thënë Çeku, duke shtuar se procesi i rishikimit të FSK-së kërkon kohë, koordinim, studim, harmonizim por, sipas tij, është proces i pandalshëm.

Çeku në një intervistë për “Epokën e re” ka vlerësuar se FSK-ja është në rrugën e duhur për t’i arritur objektivat. “Nuk dëshirojmë të flasim me data, por dëshirojmë që këtë proces ta bëjmë mirë, të koordinuar, të harmonizuar dhe me përkrahjen e të gjithë partnerëve tanë. Natyrisht se ky proces nuk varet krejtësisht nga ne, por në këtë proces jemi bashkërisht dhe do t’ia dalim në fund bashkërisht. Data dhe afate kohore nuk mund të jap”, është shprehur Çeku.

Ministri Çeku ka thënë se FSK-ja është e gatshme t’i mbrojë Kosovën dhe qytetarët e saj në gjithë territorin e Kosovës. “FSK-ja është në shërbim të popullit të Kosovës. FSK-ja është në shërbim të të gjithë qytetarëve të Kosovës kudo që ata janë, në veri, në lindje, në jug apo në perëndim”, ka thënë Çeku, duke shtuar se detyra e FSK-së është të jetë pranë qytetarëve të çdo komuniteti. /Indeksonline/