Rikthimi i Bashotës në krye të Bibliotekës, është shkelje ligjore

Rikthimi i Sali Bashotës në Bibliotekën Kombëtare të Kosovës, si kryetar i Këshillit Drejtues, pozitë kjo thuajse edhe më e rëndësishme sesa ajo që ka mbajtur prej 10 vitesh si drejtor i saj, po konsiderohet shkelje ligjore dhe parimore nga ana e njohësve të akteve ligjore, por edhe nga vet punëtorët e Bibliotekës.

Ministri i Kulturës, Memli Krasniqi një javë para vitit të ri ka emëruar Bashotën kryetar të Këshillit Drejtues të Bibliotekës, por kjo ka nxitur reagime të ish-vartësve të tij, nëpunës të këtij institucioni, shkruan Koha Ditore.

Njëri ndër ta, Avdi Lakna, madje i ka dërguar një letër të hapur ministrit Krasniqi, në të cilën ai ka shkruar se e ka habitur dhe shqetësuar pa masë vendimi i tij si ministër për të vënë në krye dikë si Bashota.

Veç tjerash ai tha se emërimi i Bashotës në postin që ia ka dhënë Krasniqi është edhe shkelje ligjore, pasi kjo është në kundërshtim me nenin 17 të ligjit për parandalimin e konfliktit të interesit në ushtrimin e funksionit publik.