Rikomponohet koalicioni qeverisës në Bujanoc

Këshilltarët e Partisë Përparimtare Serbe të Tomisllav Nikoliqit në Kuvendin e Komunës së Bujanocit do të bëhen pjesë e koalicionit qeverisës, në përbërje të të cilit deri tash kanë qenë Partia Demokratike e Nagip Arifit, Grupi i Qytetarëve i Arsiqit, Rajonet e Bashkuara të Serbisë dhe koalicioni i Partisë Demokratike e socialistëve, tha kryetari i këshillit komunal të Partisë Përparimtare, Nenad Mitroviq për agjencinë FoNet.

Sipas tij, kjo parti do të fitojë katër vende në pushtet nga kuota që i takon korpusit serb në komunën etnikisht të përzier të Bujanocit.

Mitroviq do të jetë edhe ndihmës për çështje ekonomike i kryetarit të Komunës, Nagip Arifi, kurse do të ketë edhe një anëtar të këshillit komunal, postin e drejtorit të një çerdhe të fëmijëve dhe një përfaqësues në Agjencinë për zhvillim lokal.

Pushtetin lokal në Bujanoc pas zgjedhjeve të fundit lokale e kanë formuar Partia Demokratike e Arifit me 12 këshilltarë, Grupi i Qytetarëve me 5 dhe Lista serbe për Bujanoc më të mirë me 4 këshilltarë, kurse tashti do t’iu bashkohen edhe 2 këshilltarë të “Përparimtarëve”.

Partia Për Veprim Demokratik, Lëvizja për Progres Demokratik dhe Unioni Demokratik i Shqiptarëve, që të tri këto parti shqiptare, janë në opozitë.