Rexhepi: Ekonomia e Kosovës me tendenca përkeqësimi

Rexhepi ka treguar se papunësia në Kosovë çdo herë ka qenë problem, por sipas tij këtë kohë është vërejtur më shumë.

“Investitorët ndërkombëtarë, përveç tjerash po i frikëson edhe situata aktuale që është në Kosovë, ku vendi po shkon drejt një jostabiliteti politik, krize kushtetuese dhe po reflekton pamundësinë, mosdashje apo inatet e liderëve politikë që po rrezikojnë funksionimin e shtetit”, thotë në intervistën dhënë Radios Evropa e Lirë, drejtori ekzekutiv i Qendrës për Hulumtime Strategjike dhe Sociale, Ibrahim Rexhepi.

Rexhepi ka treguar se papunësia në Kosovë çdo herë ka qenë problem, por sipas tij këtë kohë është vërejtur më shumë.

“Problemi i papunësisë është e vërtetë se gjithmonë ka qenë aktual, varësisht prej rrethanave, ambientit, intervaleve kohore – herë ka qenë preokupim numër një, herë numër dy e tre i qeverive. Por, kësaj here ka qenë shumë më i theksuar, shumë më aktual dhe mënyra se si e kanë artikuluar ato gjatë fushatës ka qenë e kuptueshme dhe e pranueshme”, tha Rexhepi.

Për ta ulur numrin e të papunëve, Rexhepi thotë se njëherë duhet të punohet në atë drejtim të përmirësohet ambienti e më pas të premtohen vendet e punës.

“Mirëpo, sa ka pasur mbështetje reale, sa është mundësia e implementimit, sa vërtet mund të bëjnë apo t’u afrohen atyre shifrave që kanë përmendur, kjo është bukur diskutabile për faktin se punësimi nuk është vetëm çështje e vullnetit, e statistikave dhe e votave do të thosha. Paraprakisht, duhet të punohet shumëçka, e që ka mundur të punojë edhe qeveria e deritashme, që të përgatitet ambienti – e atëherë të pritet punësimi”.

“Madje, në ato rrethana vetëm të pritet punësim dhe zhvillim ekonomik pa e potencuar shumë a do të jenë vetëm 200 mijë apo do të jenë më shumë, apo më pak, ajo krejtësisht varet prej asaj se sa krijon ambient zhvillimor edhe ambient për rritjen e numrit të vendeve të punës në sektorin privat, jo në sektorin publik”, ka thënë Rexhepi. /Telegrafi/