Remi kërkon koalicion PDK-LDK

Nënkryetari i Partisë Demokratike të Kosovës, Rrustem Mustafa – Remi vazhdon të mbrojë qëndrimin për një koalicion të madh në mes të PDK-së dhe LDK-së, i cili, sipas tij do të ishte i aftë të marrë vendime të rëndësishme me interes për Kosovën.

Ish komandanti i UÇK-së për Llap, nuk e sheh si zgjidhje koalicionin në mes të PDK-së dhe AAK-së, pasi sipas tij, për proceset e mëdha që priten për vendin duhet një koalicion më i fortë dhe më i qëndrueshëm që arrihet vetëm me LDK-në, e ku nuk përjashtohen partitë më të vogla.

“Jam i mendimit se Kosovës i duhet një koalicion PDK-LDK, pasi mendoj se do të ishte i vetmi koalicion që garanton shumicën dhe që është i aftë të marrë vendime të rëndësishme për vendin dhe në interes të vendit”, ka thënë Mustafa për portalin Korieri.info.

Sipas tij, duhet ndryshimi i qasjes qeverisëse në Kosovë, dhe ai mendon se asnjë koalicion tjetër nuk e garanton këtë ndryshim.

“Ndryshimi i qasjes qeverisëse mund të bëhet vetëm me një koalicion PDK-LDK. Me të tjerët mund vetëm të vazhdojmë këtë qasje që e kemi që nga paslufta, e që konsideroj se është ndër hallkat më të dobëta të shtetit tonë të ri, i cili ka nevojë për një zhvillim më të madh ekonomik, për një arsim më cilësor, për sundimin dhe forcimin e rendit dhe ligjit dhe atë duke filluar nga Prishtina,e tutje”, thotë Mustafa.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).