Rektori Hajrizi mori pjesë në Kongresin Kombëtar të Arsimit në Shqipëri

Rektori i UBT-së, Prof. Dr. Edmond Hajrizi mori pjesë në Kongresin Kombëtar të Arsimit, me temën: “Sfidat e arsimit cilësor dhe gjithëpërfshirës drejt integrimit evropian”, i cili është organizuar në Pallatin e Kongreseve, në Tiranë.

Në panelin e katërt në të cilin është diskutuar rreth temës: “Digjitalizimi në Arsimin e Lartë, sfidë dhe mundësi për Institucionet e Arsimit të Lartë”, rektori i UBT-së, Prof. Dr. Edmond Hajrizi ka prezantuar idetë, instumentat dhe teknikat rreth transformimit të arsimit të lartë nëpërmjet digjitalizimit.

“Të gjitha praktikat tregojnë se në ato vende ku ka pasur një bashkëpunim të mirë midis lidershipit të qytetit me universitetin, ka pasur zhvillim të mirë inovativ dhe gjenerime të reja. Gjithashtu, në fushën e zhvillimit të qëndrueshëm, duhet edhe ne si universitet të kemi rolin tonë dhe ta kemi si pjesë kryesore të strategjisë”, ka thënë rektori Hajrizi.

Rektori Hajrizi duke treguar se në UBT tashmë janë 150 fusha të jetës si studime, duke krijuar një ekosistem inovativ, si dhe zhvillimi i rreth 200 laboratorëve të ndryshëm për hulumtime, ka thënë se është e nevojshme që universitetet të krijojnë një ekosistem edhe në aspektin fizik, që nënkupton ndërlidhjen me industrinë dhe funksione të tjera.

“Përveç kësaj, natyrisht që universiteti kërkohet të jetë edhe një ekosistem në aspektin fizik, do të thotë që përveç pjesës së edukimit dhe shkencës, në fakt sot është e nevojshme që ta ndërlidhim edhe me funksione të tjera, sikurse ai industrial, funksionet e shërbimeve të ndryshme, si dhe studimet para-universitare”, ka shtuar rektori Hajrizi.

Në këtë kongres, morën pjesë edhe shumë personalitete të njohura të arsimit dhe politikës, sikurse kryeministri i Shqipërisë, Edi Rama, ministrja e Ministrisë së Arsimit dhe Shkencës në Shqipëri, Evis Kushi, si dhe ambasadorja e Shteteve të Bashkuara të Amerikës në Shqipëri, Yuri Kim.

Qëllimi i këtij Kongresi është të bashkojë në një hapësirë diskutimi shumë aktorë në fushën e arsimit, përfshirë arsimin para-universitar, arsimin e lartë, kërkimin shkencor, agjencitë, partnerët në nivel kombëtar dhe ndërkombëtar, përfaqësues të shoqërisë civile dhe donatorët e projekteve në fushën e arsimit.

Shpërndaje.
© RAJONIPRESS