Refuzohet kërkesa e Xhevat Bislimit për seancë të mbyllur

Gjilan – Këshilltari i PDK-së Xhevat Bislimi ka kërkuar seancë të mbyllur, por kjo është refuzuar nga kryesuesi i Asamblesë me arsyetimin se është e kundërligjshme kërkesa e tij.

Në seancën e dytë të rregullt të Kuvendit Komunal të Vitisë janë shqyrtuar dhe votuar me shumicë votash propozim vendimi për themelimin e ndërmarrjes publike komunale, propozim vendimi për formimin e komisionit të aksionarëve për N.P.L”Natyra” ku anëtarë u zgjodhën Dionita Tahiri nga LDK dhe Bujar Ostrogllava nga LDD ndërsa Kryetari i Komunës do të përzgjedhë edhe një anëtarë nga ekzekutivi , gjithashtu është votuar edhe propozim vendimi për ndarjen e banesave me programet e veçanta të banimit ku sipas saj 20 banesa do të ndahen për të pastrehët, 4 për veteranët e luftës së UÇK-së ndërsa 1 për komunitetin jo shumicë.

Ndonëse në fillim ishte votuar edhe kërkesa e këshilltarit të PDK-së Xhevat Bislimi për thirrjen e një seance te mbyllur, pas disa këshillimeve kryesuesi kërkoj që të mos thirrët kjo seancë pasi që konsiderohet si e kundërligjshme, por që çështjet të cilat nuk dëshirohen të diskutohen para opinionit publik të diskutohen pa praninë e publikut dhe mediave, në një seancë tjetër për të cilën do të vendos kuvendi me vendim.

Gjithashtu me kërkesën e këshilltarit Bujar Ostrogllava nga LDD është diskutuar edhe për gjendjen e rrugëve në territorin e komunës së Vitisë . Ndërsa gjatë kësaj seance ishte e paraparë të diskutohet edhe për rregulloren e barazisë gjinore ajo është shtyrë për ndonjë seancë tjetër pasi që Zyrtarja e Barazisë Gjinore ishte për vizitë zyrtare jashtë shtetit./rajonipress/