Refugjatë nga Kosova po jetojnë në tenda poshtë një ure në Lion

Prishtinë – Shumë qytetarë nga Kosova që kanë mësyrë Francën për të kërkuar azil, jetojnë në kushte tejet të rënda. Disa prej tyre që janë në qytetin e Lyonit, po jetojnë në tenda të vendosura poshtë një ure të qytetit francez. Numri i familjeve kosovare në këto hapësira të ngushta, duket të jetë i madh, ndërsa edhe në përgjithësi, numri i atyre që kanë udhëtuar drejt Francës, është mjaft i madh.

Vetëm gjashtë muajt e parë të këtij viti, 2056 kosovarë kanë kërkuar azil në Francë, bazuar në të dhënat e Ministrisë së Punëve të Brendshme. Ndërkohë, që numri i kosovarëve që janë kthyer nga ky shtet nga viti 2010, duket të jetë shumë më i vogël.

Në vitin 2010, nga Franca ishin kthyer 377 kosovarë. Në vitin 2011, ishin kthyer 455, ndërsa në vitin 2012, 369 persona. Këtë vit, deri më 1 shtator janë regjistruar gjithsej 241 persona të kthyer, bazuar në të dhënat e Departamentit për Shtetësi, Azil dhe Migracion në kuadër të Ministrisë së Brendshme. Megjithatë, Ministria nuk ka pasur informacione për kushtet ose trajtimin e kosovarëve azilkërkues atje.

Një përgjigje për interesimin e KTV-së për këtë temë nuk e ka kthyer as Ambasada e Francës në Prishtinë. KTV-ja raportoi ditë më parë për kushtet e rënda, në të cilat jetojnë kosovarët që janë vendosur në komunën Annecy të Francës.