Reformimi i administratës publike, proces i pandalshëm

Ministri i Administratës Publike, Mahir Jagxhillar, ka bërë me dije se janë duke punuar për krijimin e një administrate publike moderne, të qëndrueshme dhe të paanshme në shërbim të qytetarëve dhe të bizneseve.

Ai ka treguar se aktualisht MAP-i është në fazën finale të rishikimit të Strategjisë për Modernizimin e Administratës Publike 2018-2020.

Në këtë intervistë dhënë për gazetën “Epoka e re”, Jagxhillari ka deklaruar se reformimi i administratës publike do të jetë proces i pandalshëm.

Ministri Jagxhillar ka paralajmëruar se gjatë muajit qershor do të dërgohen për miratim në Qeveri tri ligjet bazike të administratës publike: Ligji për Pagat, Ligji për Shërbimin Civil dhe Ligji për Organizimin e Administratës Publike.

Ai ka treguar se në agjendën e reformave nuk është paraparë largimi i punonjësve, por profesionalizimi dhe efikasiteti i administratës publike.

“Siç e dini, reforma e administratës publike është një proces që kërkon kohë. Aktualisht jemi në fazën finale të rishikimit të Strategjisë për Modernizimin e Administratës Publike 2018-2020. Procesi i reformimit të administratës publike është fokusuar në ndryshimin apo reformimin përmes pakos legjislative që përmban Projektligjin për Shërbimin Civil, Projektligjin për Pagat dhe Projektligjin për Organizimin e Administratës Publike. Si dhe nga ana tjetër, me zbatimin e Kornizës Strategjike për Reformën e Administratës Publike që përbëhet nga katër strategji: Strategjia e Koordinimit të Politikave, Strategjia e Rregullimit më të Mirë (Legjislacionit), Strategjia e Modernizimit të Administratës Publike dhe Strategjia e Menaxhimit të Financave Publike”, ka thënë Jagxhillar.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).