Reforma e plotë, pas zgjedhjeve

Reforma zgjedhore do të jetë temë diskutimi edhe pas zgjedhjeve të përgjithshme. Barra për ta bërë këtë do t’i rëndojë konjukturës se re politike që pritet të udhëheqë me vendin.

Këtë porosi Bashkimi Evropian ua ka drejtuar zyrtarëve më të lartë të vendit dhe partive politike. Përfaqësuesit e vendeve të BE-së, edhe pse janë pajtuar me ndryshimet që po bëhen në Ligjin për Zgjedhjet e Përgjithshme, kanë premtuar se nuk do të jenë kundër zgjedhjeve me kusht që reforma substanciale siç e quajnë ata, të vazhdojë gjatë viteve të ardhshme.

Për këtë qëllim Përfaqësuesi Special i BE-së në Kosovë, Samuel Zhbogar, është takuar të mërkurën në Kuvend, me kryeparlamentarin Jakup Krasniqi, anëtarët e Kryesisë, shefat e grupeve parlamentare dhe kryetarët e komisioneve.

Në takim, sipas të pranishmëve, ai ua ka bërë të qartë se Kosova ka ende shumë punë sa i përket reformës, në mënyrë që ajo të jetë në harmoni me pritjet e ndërkombëtarëve. Takimi ka qenë i mbyllur për media mirëpo burime i kanë thënë gazetës, se Zhbogar e kishte thirrur atë në mënyrë që të diskutohet për hapat e mëtutjeshëm në procesin e Marrëveshjes së Stabilizim-Asocimit…(Tribuna).