Reagon SBASHK-u: MASHTI shkëputi njëanshëm kontratën kolektive, kjo është e paligjshme

Ministria e Arsimit, Shkencës, Teknologjisë dhe Inovacionit (MASHTI) ia ka shkëputur kontratën kolektive Sindikatës së Bashkuar të Arsimit, Shkencës dhe Kulturës të Kosovës (SBASHK).

Në medie gjatë ditës së sotme u publikua një dokument në të cilin thuhet se Ministria e Arsimit ia ka shkëputur kontratën kolektive SBASHK-ut.

Vjollca Shala, nënkryetare e SBASHK-ut, ka thënë për “Zeri.info” se kjo gjë është e paligjshme, pasi është shkëputje e njëanshme.

“Ne nuk kemi marrë një dokument të tillë akoma, por megjithatë nëse ministria e ka shkëputur njëanshëm kontratën kolektive, atëherë kjo është e paligjshme, ngase në kontratën kolektive jepet procedura për shkëputje të kontratës kolektive dhe kjo nuk i kontribuon dialogut social mes SBASHK-ut dhe Ministrisë një shkëputje e njëanshme e tillë e kontratës kolektive”, ka thënë Shala për “Zeri.info”, duke shtuar se nuk kanë qenë të njoftuar aspak për këtë vendim të MASHTI-t.

E pyetur nëse kjo është si lloj hakmarrjeje ndaj SBASHK-ut për shkak të grevave, Shala ka thënë se këtë e di MASHTI, por ajo insiston se ky veprim i Ministrisë është i paligjshëm.

“Atë nuk e kisha thënë, sepse mund ta thotë Ministria një gjë të tillë nëse e ka bërë një gjë të tillë. Por megjithatë edhe ne po e shohim se po qarkullon nëpër media se është bërë shkëputje e kontratës kolektive që është nënshkruar mes SBASHK-ut dhe MASHTI-t, njëanshëm vetëm nga ana vetëm e Ministrisë, MASHTI-t, që e thashë që është e paligjshme, sepse aty shpjegohet se si është procedura për shkëputjen e kontratës kolektive”, deklaroi Shala. /Zëri

Shpërndaje.
© RAJONIPRESS