Reagon Qemajl Mustafa: Gjilani e rrezikon rikthimin e valës së pandemisë

Gjilan – Sipas burimeve plotësisht të besueshme të informimit, sot në Gjilan janë hapur numër shumë i vogël i aktiviteteve hoteliere për të dhënë kafe, pije e ushqim në stilin “merre me veti” (take away). Ka rënë në sy kafeteria PAPAKU dhe shumica e ëmbëltoreve por jo edhe të tjerat. Në këtë sektor, gjatë ditës është vërejtur një rregullësi e qarkullimit dhe e shërbimit duke e ruajtur rendin dhe distancën sociale edhepse jo të gjithë kishin mjete mbrojtëse (maska e dorëza) ka shkruar Qemajl Mustafa.

Mustafa ka thënë se brengosëse ishte situata te butikët (shitoret e veshmbathjes) ku pa asnjë kriter (shumica e klientëve pa mjete mbrojtëse dhe pa e respektue distancën kanë shkaktue tollovi nëpër këto shitore). Janë pa edhe nga 20, 30 e më shumë klientë në hapësira të kufizuara e që potencialisht e rrezikojnë njëri tjetrin.

“Ngjashëm ka qenë edhe nëpër shitoret që ofrojnë mallra sezonale me çmime joshëse.
Komuna, bashkë me menaxherët e aktiviteteve afariste, me inspektoratin e vet, me kapacitet e MSH dhe me PK-në duhet të jenë shumë aktivë në vendosjen e rregullit te respektimi i distancës dhe te bartja e mbrojtjes në vendet e frekuentuara. Përndryshe komuna rrezikon qe t’i kthehet një vale e re e të infektuarve me Covid19 e që do të përcillej me pasoja shumë më të mëdha se këto deri tani. Nëse kapacitetet e saj dhe të qeverisë nuk mjaftojnë, komuna duhet të formojë shumë ekipe vullnetarësh të cilët do të kujdestaronin me ndërrime të shkurtra (maksimum 4 orëshe) pranë të gjitha aktiviteteve kudo nëpër qytet. Apelojmë te autoritetet e komunës që me kohë të ndërmerr veprimet e duhura se ndryshe mund të bëhet edhe keq edhe vonë” ka shkruar Qemajl Mustafa./rajonipress/