Reagon Matoshi: LDK e PDK ndëshkimin e marrin në vjeshtë
RajoniPress
14:24, 3 Prill, 2017
Gjilan – Politikat e LDK ashtu sikurse edhe të PDK-së në Kamenicë po e shndërrojnë komunën në një shtëpi pleqsh, duke ja marrë rinisë shpresën për jetë këtu, prandaj reflektoni pak sepse një ditë mund të ju rëndohet shumë barra e përgjegjësisë dhe ta ndieni veten shumë keq para atyre votat e të cilëve i trafikuat në rajone tjera të Kosovës ka thënë Fatmir Matoshi.
Reagimi i Fatmir Matoshit
Pakënaqësitë qytetarët i shprehin me votë, ashtu si i kanë shprehur në fundin e vitit 2013 kur ua morën mandatin Juve. Ju keni bërë një matje të përgjithshme të opinionit të qytetarëve, duhet të kishit informata më të sakta se ndaj kujt i kanë pakënaqësitë qytetarët.
Duke qenë vetëm pjesë e qeverisjes ne si AKR po realizojmë projekte e po sjellim të mira e donacione në Kamenicë më shumë sesa Ju kur e kishit pozitën e Kryetarit të Komunës. Nëse këtë që po e shohim nëpër rrjete sociale nga takimet Tuaja me qytetarët nëpër lokalitete e quani mbështetje për fitore, atëherë kjo mbështetje nuk ju ofron më shumë se pozitën e katërt në zgjedhje.
Ju duhet të jeni i informuar se jeni parti mbështetëse e PDK-së në Kamenicë më shumë sesa ato parti tjera që po i përmendni, zyrtarët Tuaj partiak janë frekuentues të rregullt dhe mbështetës të politikave të kryetarit aktual më shumë se partnerët e koalicionit.
Një kryetar me korrespondencë nuk sjell shpresa në Kamenicë, Ju përfaqësoni kthim në të kaluarën, nuk përfaqësoni shpresë për të ardhmen. LDK dhe PDK jeni përgjegjëse për gjendjen e rëndë që e ka komuna jonë. Ju keni marrë besim të qytetarëve disa herë dhe e keni kthyer besimin në zhgënjim, me mospunë, me shpenzime enorme të luksit tuaj.
Politikat e LDK ashtu sikurse edhe të PDK-së në Kamenicë po e shndërrojnë komunën në një shtëpi pleqsh, duke ja marrë rinisë shpresën për jetë këtu, prandaj reflektoni pak sepse një ditë mund të ju rëndohet shumë barra e përgjegjësisë dhe ta ndieni veten shumë keq para atyre votat e të cilëve i trafikuat në rajone tjera të Kosovës përfundon reagimi i Matoshit./rajonipress/