Reagimi im i takon ndërgjegjësimit të shoqërisë

Nga Mimoza Shkodra – Dua sinqerisht të sqaroj që reagimi im lidhur më trajtimin e femrës gjatë emërimit të drejtorëve të komunës nuk ka të bëjë aspak më akuzën e opozitës drejtuar pushtetit por është zë i pastër i femrës, është brengë e një gruaje të komunës tonë për të mbrojtur të drejtat e llojit të saj e që janë gratë e kësaj komune.

Pra, do të doja të kuptohem drejtë, nuk e bëra dhe nuk do ta bëj asnjëherë për pikë politike, por e bëra për ndërgjegjësimin tonë si shoqëri. Opozita e sotme e ka rastin që të reagojë nga forumet e saj të gruas dhe nga zyrat e saja të informimit dhe do të duhej ta bënte patjetër (së paku unë kështu mendoj).

E thashë që as PDK nuk ishte për me i “marrë mësysh” në këtë aspekt, por sadopak kishte dy femra të emëruara drejtoresha e që ishin të zgjuara dhe punëtore që erdhën si emërime nga kryetari me prejardhje nga PDK. Kjo është për respekt krahasuar me zero emërime femrash që i bëri kryetari i tanishëm. E ka rastin të korrigjohet sadopak më drejtoratin e DKRS. Të shohim.

Sa i përket zgjedhjes së kryesueses së kuvendit (e që nuk është emërim i kryetarit), këtë e përshëndes, e mirënjohim patjetër dhe e përgëzojmë LDK-në së pari për hapësirën që i është krijuar femrës për punë në forumin e gruas e pastaj edhe për propozimin dhe votimin e kryesueses me qrast këtë të fundit e uroj publikisht.

Por, këto janë dy çështja të ndara. Ne e patëm fjalën për nivelin e të emëruarve të lartë të kryetarit në ekzekutiv pra, për drejtorët. Këtu, sado që të mundohemi të improvizojmë vetëm sa do t’a “kallaitim” edhe më keq sepse akti tashmë është i njohur për publikun dhe thonë “katundi që shihet kallauz nuk donë”.

E sa i përket liderizmit të kryetarit që qenka aq kompleks e me “shumë të panjohura” dhe si i tillë edhe sipas jush na qenka vështirë i deshifrueshëm për njerëzit e thjeshtë që kryetarin e votuan me shumicë votash, pale të shohim. Deri këtu, kryetarin vetëm mund ta përgëzojmë për numrin e madh të votave që mori, për pritjen ë gjatë ceremoniale të qytetarëve në zyrën ë kryetarit, për seancën në të cilën u zgjodh kryesuesja e KK dhe për emërimin e vonuar dhe (për mua) jo të qëlluar të drejtorëve të komunës.

Megjithatë, kryetari pas shumë vitesh të punës në të dy nivelet e qeverisjes, tashti do të duhej ta ketë një përvojë tjetër që pretendojmë të na kthehet në dobi neve qytetarëve të Gjilanit.

Qytetarët detyrën e tyre e kryejtën me datën një dhjetor 2013 duke e votuar me shumicë votash dhe duke e fuqizuar për kryetar të komunës e tashti ai është në potez. I mbetet kryetarit që besimin qytetar të e kthejë me realizim dhe përparim të mirë të komunës e sidomos me hapjen e mundësisë për investime e punësim (mos të harrojmë sërish – të femrës posaçërisht).