Reagimi i Alban Hysenit pas ngjarjeve tragjike në Gjilan, qytetarët e kritikojnë ashpër në komente

Gjilan – Pas mesazhit të ngushëllimit dhe paralajmërimit për mbledhje urgjente të Këshillit Komunal për Siguri në Bashkësi, kryetari i Gjilanit, Alban Hyseni, është përballur me kritika nga komentues në rrjetet sociale, të cilët kanë ngritur shqetësime për sigurinë në qytet.

Ngjarjet e rënda që kanë tronditur Gjilanin ditët e fundit kanë nxitur reagime të shumta në rrjetet sociale. Pas një mesazhi publik të kryetarit të komunës, Alban Hyseni, ku ai shprehu ngushëllime për familjet e viktimave dhe paralajmëroi masa institucionale për përmirësimin e sigurisë, disa qytetarë kanë shprehur pakënaqësitë e tyre përmes komenteve kritike.

Në reagimin e tij, Hyseni bëri të ditur se, pas vrasjes së dyfishtë të raportuar të premten dhe një incidenti tjetër me pasoja fatale të dielën, do të thërrasë në mbledhje urgjente Këshillin Komunal për Siguri në Bashkësi.

Ai theksoi se Komuna do të koordinojë veprimet me Policinë e Kosovës dhe institucionet përgjegjëse, me qëllim të garantimit të rendit publik dhe sigurisë së qytetarëve.

“Mbrojtja e jetës së qytetarëve tanë është prioriteti ynë kryesor institucional”, shkroi Hyseni, duke u bërë thirrje qytetarëve për maturi, qetësi dhe bashkëpunim me organet e rendit.

Megjithatë, ky reagim nuk i ka bindur të gjithë komentuesit. Disa prej tyre kanë kërkuar përgjegjësi më të madhe institucionale dhe veprime konkrete përballë situatës së sigurisë në qytet.

Lindbardh Selimi, në komentin e tij, kritikoi ashpër udhëheqjen politike, duke pretenduar se institucionet po mjaftohen me reagime publike në vend të veprimeve konkrete.

“Ti edhe dostat e tu n’për qeveri, pos me shkru statusa ngushllimi n’për Facebook, tjetër sen s’keni me pas çka me bo”, shkroi Selimi, duke shprehur pakënaqësinë e tij për mënyrën se si po trajtohet situata.

Ndërkaq, Arian Sylejmani ia adresoi kritikat drejtpërdrejt udhëheqjes komunale, duke pretenduar se Gjilani ka qenë më parë qytet më i qetë dhe duke e lidhur përkeqësimin e situatës me ardhjen e udhëheqjes aktuale në pushtet.

“Po ju të paditurit e keni pru në këtë gjendje këtë qytet”, shkroi ai në komentin e tij.

Komentet pasqyrojnë pakënaqësinë e shprehur nga këta qytetarë për gjendjen e sigurisë dhe pritjen që institucionet të ndërmarrin masa të prekshme.

Megjithatë, këto janë qëndrime individuale të komentuesve dhe nuk përbëjnë domosdoshmërisht opinionin e përgjithshëm të qytetarëve të Gjilanit.

Në këtë situatë, vëmendja mbetet te veprimet që do të ndërmarrin institucionet komunale dhe organet e sigurisë, si dhe te rezultatet konkrete të koordinimit të paralajmëruar nga Hyseni.

Ngjarjet e fundit kanë rikthyer në qendër të debatit publik çështjen e sigurisë në Gjilan, ndërsa qytetarët presin që reagimet institucionale të shoqërohen me masa konkrete për parandalimin e rasteve të ngjashme./rajonipress/