Për EULEX-in dhe Institutin e Mjekësisë Ligjore të Kosovës, më nuk ka dyshim që Dino Asanaj bëri vetëvrasje.
Por dikush tjetër nuk po e lë rastin që të flejë.
Prokuroria e Qarkut në Prishtinë, që është e ngarkuar më këtë rast ka thënë se ende është duke punuar për zbardhjen e rrethanave të vdekjes së Dino Asanajt, duke demantuar deklarimet e djeshme të EULEX-it, që Dino Asanaj ka bërë vetëvrasje.
Raporti i autopsisë i nënshkruar nga tre ekspertë mjekoligjorë, për rastin e vdekjes së Dino Asanajt, nuk mjafton për prokurorinë që të mbyllet rasti.
Prokurori i çështjes, Blerim Isufaj, ka konfirmuar se po punohet në zbardhjen e të gjitha rrethanave, përfshirë verifikimin nëse ai është vrarë apo vetëvrarë.
Burime të përfshira në hetim kanë konfirmuar për RTK-në se ende nuk ka përfunduar ekspertiza grafologjike e letrës që Asanaj besohet ta ketë lënë pas vetes pak para se të ndërronte jetë.
Ekspertiza pritet ta dëshmojë vërtetësinë e shkrimit nëse letra është shkruar nga Asanaj.
Këto burime kanë bërë të ditur se tashmë është urdhëruar të bëhet hulumtimi i detajuar i mesazheve të viktimës të këmbyera me telefonat e tij mobil si dhe verifikimi i thirrjeve dhe kontakteve që ai ka pasur para se të ndërronte jetë.
Në ekzaminim si provë është përfshirë edhe kompjuteri i të ndjerit derisa besohet se një e-mail nga adresa e tij në ditën e vdekjes, i është adresuar ambasadës amerikane në Prishtinë.
Në kuadër të ekzaminimeve është urdhëruar edhe marrja e ADN-së dhe provave të tjera lidhur me të për të verifikuar praninë ose jo të ndonjë personi tjetër në vendin e ngjarjes.
Deri tani kanë dhënë deklaratat e tyre në cilësi të dëshmitarëve 21 persona, përfshirë këtu biznesmenin e përmendur në letrën që besohet ta ketë lënë pas Asanaj, Abdurrahman Konjufca, dhe dëshmitarë të tjerë.
Një fakt tjetër që të paktën hetuesia pret se do të ndihmojë në zbardhjen e rrethanave të vdekjes së Asanajt, janë dhe dy testamente të tij por të cilat mund të hapen vetëm në Gjykatë.
EULEX-i, edhe pse i përfshirë në hetime, nuk ka pranuar që të deklarohet për ecurinë e hetimeve. Krejt çka thonë për këtë rast nëpërmjet postës elektronike është:
“Një mjek i EULEX-it ka qenë pjesë e komisionit që e ka kryer autopsinë. Autopsia është kryer në prani të një prokurori të EULEX-it dhe një prokurori vendor. Gjetjet e autopsisë nuk tregojnë asgjë tjetër përpos vetëvrasjes”.
Shefi i AKP-së, Dino Asanaj u gjet i plagosur me thikë të enjten e kaluar në zyrën e tij private në fshatin ndërkombëtar në Prishtinë. Ai nuk u mbijetoi plagëve dhe ndërroi jetë po atë ditë në QKUK./Indeksonline/
