Rasmussen: Jemi të gatshëm të kontribuojmë

Sekretari i përgjithshëm i NATOs-s, Anders Fogh Rasmussen, ka komentuar sot dialogun që po zhvillohet në Bruksel ndërmjet Kosovës dhe Serbisë, duke thënë se mirëpret të gjitha përpjekjet për të gjetur një zgjidhje politike.

Në një takim me gazetarët në Bruksel, zoti Rasmussen ka thënë se trupat e aleancës veriatlantike janë të gatshme për të zbatuar rolin që kanë, nëse mund të kontribuojnë në gjetjen e zgjidhjeve përfundimtare.

“Jemi të gatshëm, jemi në kontakt të vazhdueshëm me baroneshën Ashton, ka bashkëpunim të ngushtë midis Bashkimit Evropian dhe NATO-s, në këtë periudhë kritike të negociatave”, ka thënë Rasmussen.