Rashiti: Me inate politike, destruktivitet dhe me tendenca negative nuk qeveriset komuna

Gjilan – Mbi 2.5 milion euro të bllokuara si pasojë e mosfunksionimit të punës së Kuvendit Komunal në Gjilan ka shkruar Riad Rashiti i PDK-së.

Reagimi i plotë:

Papërgjegjësia institucionale e pushtetit të VV-së në Gjilan, inatet politike dhe problemet e jashtëzakonshme të krijuara nga kryetari i komunës, ka bërë që gjithçka të bllokohet në projektet e planifikuara në këtë vit.

Qasja destruktive e kryetarit të komunës dhe mospjesëmarrja e tij në seancat e Kuvendit Komunal dhe tendenca e tij për ta fajësuar opozitën për mos mbajtjen e seancave, ka bërë që mbi 2.5 milion euro të bartura nga buxheti i vitit të kaluar, ende nuk janë destinuar për dhjetëra projektet e planifikuara të këtij viti, ndërsa veç po kalon gjysma e vitit kalenderik.

Manipulimi publik është bërë instrument i qeverisjes së VV-së në Gjilan. Mos transparenca ndaj publikut e ka vlerësuar Gjilanin të fundit prej komunave të Kosovës.

PDK kërkon reflektim nga i pari i komunës, që të lërë inatet politike dhe të bashkëpunojë me përfaqësuesit e qytetarëve në Kuvendin Komunal. Qytetarët e Gjilanit nuk janë fajtorë dhe nuk duhet të pësojnë për shkak tekeve tuaja si kryetar komune.

Puna ligjore, bashkëpunimi dhe transparenca janë qelësi i ecjes para të projekteve dhe planifikimeve tjera për komunën tonë.