Rashiti: Gjilani me strukturë udhëheqëse të zhytur në krim dhe korrupsion

Gjilan – Në Gjilan është instaluar rrjeti i krimit ekonomik, urbanistik dhe korrupsioni i lartë që e kanë rrënuar jetën normale të institucioneve komunale dhe të qytetarëve të Gjilanit. Ndërsa në anën tjetër drejtësia pjesërisht po e kryen punën dhe detyrat e saja, kundrejt një pushteti komunal skashjmërisht të devijuar në anarki, kaos dhe korrupsion. Qeverisja e LDK dhe e Lutfi Hazirit, njësoj sikur deri në vitin 2007, e kanë bërë qytetin e Gjilanit një mundësi për keqpërdoruesit dhe zhvatësit e milionave eurove, përmes shpëlarjes së parasë dhe krimit urbanistik që po e shkatërrojnë hapësirën publike të qytetarëve të Gjilanit thotë Riad Rashiti.

Rashiti ka thënë se aktakuzat e ngritura ndaj zyrtarëve komunal, drejtorëve komunal dhe tani ndaj vet kryetarit të komunës, janë dëshmi se qeverisja e Lutfi Hazirit është zhytur thellë në keqpërdorime, shkelje ligjore dhe korrupsion.

Prokuroria Speciale e Kosovës me hetimet e saj që ka bërë ndaj kryetarit të Gjilanit dhe me ngritjen e aktakuzës ndaj tij, ka dëshmuar edhe faktin tjetër se sistemi korruptiv i qeverisjes së Lutfi Hazirit, fatkeqësisht e ka prekur edhe një pjesë të sistemit të drejtësisë në Gjilan, e cila po hesht para kësaj gjendje dhe që është vënë në shërbim të qeverisjes dhe zyrtarëve të korruptuar komunal.

Duhet vlerësuar punën dhe angazhimin e Prokurorisë Speciale të Kosovës lidhur me lëndën dhe aktakuzën e ngritur ndaj Lutfi Hazirit, për dëmin e madh prej 168 mijë euro që ia ka bërë buxhetit komunal dhe qytetarëve të Gjilanit.

Mirëpo në anën tjetër Prokuroria Speciale do të duhej të thellojë dhe vazhdojë edhe më tutje hetimet, në veçanti ndaj disa prokurorëve të Gjilanit, të cilët janë ndikuar maksimalisht në punën e tyre nga joshjet e kryetarit të komunës, duke ua punësuar anëtarët e familjarëve të tyre nëpër institucionet komunale, në kompensim për shuarjen dhe mbylljen e hetimeve ndaj kryetarit komunës.

Çdo zyrtar publik, prokurorë, gjykatës sikurse edhe vet Lutfi Haziri si kryetar i komunës, asnjëherë nuk do të mund të ikin përgjithmonë nga përgjegjësia ligjore për veprimet e tyre të bëra në mënyrë të kundërligjshme, apo aferave të ndryshme korruptive, joshjeve të ndryshme apo favorizimeve duke e dëmtuar qytetarin dhe pasurinë publike të Kosovës.

Lutfi Haziri para pak kohe kishte kërkuar publikisht dorëheqjen e ministrit Ferid Agani, kur ndaj tij ishte ngritur aktakuzë nga Prokuroria Speciale e Kosovës, tani radhën e ka vet Luta që ta bëjë një veprim të tillë, në mënyrë që drejtësia, në këtë rast Gjykata Themelore e Gjilanit ta kryej punën e saj ndaj gjykimit të Lutfi Hazirit, e pa ndikuar nga pozicioni i tij si kryetar i Gjilanit ka thënë Riad Rashiti, anëtar i KK Gjilan dhe anëtar i kryesisë së degës së PDK-së në Gjilan./rajonipress/