Rapuca: VV po i keqpërdor të rinjtë

Gjilan – Dëmi më i madh që po bënë Vetëvendosja është keqpërdorimi i të rinjve të cilët duke qenë të padjallëzuar po i shfrytëzon pamëshirshëm, vetëm për t`i arritur qëllimet e veta për pushtet ka thënë Nazmi Rapuca.

Akuzat e VV e kanë prekur edhe drejtorin e bujqësisë Nazmi Rapuca . Rapuca tha se dëmi më i madh që po bënë Vetëvendosja është keqpërdorimi i të rinjve të cilët duke qenë të padjallëzuar po i shfrytëzon pamëshirshëm, vetëm për t`i arritur qëllimet e veta për pushtet.

Sipas tij ka kohë që disa subjekte politike të komunës po mundohen ta manipulojnë opinionin se gjëja projekti i drunjve dekorativ nuk është i qëlluar, se ka keqpërdorime, se është tepër i shtrenjtë, se nuk është dashtë të prehen drunjtë ekzistues etj.

Ai tha se beson se qytetarët e dinë qëllimin e vërtetë të kësaj propagande, e që nuk është gjë tjetër përveç tendencë për të njollosur një projekt qëllim mirë dhe të nevojshëm për qytetin e Gjilanit, me shpresë se dikush do tu besojë dhe ndoshta në këtë mënyrë do të fitojnë ndonjë poen politik.

“Që është më e keqja, këta që bëjnë zhurmë, e dinë të vërtetën, sepse ne ua kemi dërguar të gjitha dokumentet dhe të dhënat për këtë projekt dhe për të gjitha projektet që i kanë kërkuar, por prapë se prapë mundohen ta rrejnë së pari veten e pastaj edhe opinionin e gjerë, pa pasur asnjë konsideratë për qytetarët e pa fajshëm”, ka thënë Rapuca..

Sipas Rapucës deri tani janë mbjellë gjithsej 700 drunj dekorativ, prej të cilëve kanë zënë 656. Këta drunj të mbjellë (656) i kanë kushtuar komunës 48.493,00 €.

“Me projekt janë planifikuar për t’u mbjellë 3693 drunj dekorativ. Sikur të mbilleshin të gjithë drunjtë e planifikuar do të kushtonin 251.493,40. Mirëpo për shkak të pengesave si janë: infrastruktura nëntokësore (gypat e kanalizimit, gypat e ujësjellësit, kabllo elektrike, kabllo të telefonit etj.) dhe trotuareve tepër të ngushta, në një pjesë të konsiderueshme të hapësirave publike nuk do të mund të mbillen drunjtë e planifikuar”, ka thënë Rapuca..

Sipas tij, llogaritet që mbjellja e drunjve dekorativ nuk do ta kalojë shifrën mbi 1500. Nga kjo del që i tërë projekti do të mund të kushtojë rreth 110.000,00 € Pra do të paguhet vetëm për aq drunjtë sa do të mbillen.

“Se sa seriozë janë Vetëvendosja, më së miri flet projekti i tyre për drunjtë dekorativ, të cilin e patën realizuar me aq pompozitet. Ata mbollën nja 100 fidane shkel e shko, vetëm sa për marketing politik, por asnjëri prej tyre nuk u ka zënë”, ka thënë Rapuca..

Sipas tij, Vetëvendosjes do të duhej t`i vinte turp për këtë maltretim që po u bën qytetarëve me propagandë dhe veprime ekstreme, të pa arsyeshme, të pamatura dhe shumë herë të dëmshme për shtetin e brishtë të Kosovës, i cili ka nevojë për seriozitet dhe konstruktivitet e të gjithë neve, edhe të Vetëvendosjes, sado që lakmia për të ardhur në pushtet me çdo kusht, ua ka verbuar sytë. /rajonipress/