Ramush Haradinaj: Kosova është keq, por mos ikni

Ramush Haradinaj, në një postim në Facebook thotë se Kosova është keq, por mos ikni. “Të mbahemi, si në ditët më të vështira”, shkruan Haradinaj, raporton Express.

Lexojeni të plotë:

“Çdo ditë pranoj me qindra mesazhe nga ju bashkëqytetarë e bashkëatdhetarë nga mbarë bota. Ndajmë bashkë dhimbjen dhe shqetësimin e madh për gjendjen e Kosovës sot. Jemi keq. Është e hidhur kur pas disa dekadave sakrificë e mund, nuk e shohim vendin ashtu siç e deshëm. Rinia na bredhë rrugëve, pa punë e perspektivë, intelektualët pa shpresë se një ditë do të japin kontributin e tyre për vendin, gjyshet e gjyshërit tanë pa pleqëri të dinjitetshme. Me të gjitha që më shkruani pajtoj. Por nuk pajtoj se duhet të ikim nga Kosova. Të mbahemi, si në ditët më të vështira, të bashkohemi në punë, se vetëm kështu do të vijnë ditët e mira. Të qëndrojmë bashkë, sepse i duhemi Kosovës!

RH”