Qytetarja kritikon Kadri Rahimajn për pagat e punëtorëve: “Mos ua hani djersën atyre që mbajnë pastër Kamenicën”

Kamenicë – Një koment i bërë nga qytetarja Alena Gashi në një status të kryetarit të Kamenicës, Kadri Rahimaj, ka nxitur reagime në rrjetet sociale, pasi ajo kritikoi trajtimin financiar të punëtorëve të ndërmarrjes publike “Dardania”, të cilët sipas saj po bëjnë një punë të madhe në mirëmbajtjen e qytetit, por pa u vlerësuar siç duhet.

Reagimi i saj erdhi pasi kryetari Rahimaj publikoi një status lavdërues për angazhimin e përditshëm të punëtorëve të ndërmarrjes publike në pastrimin dhe mirëmbajtjen e hapësirave publike në Kamenicë.

Megjithatë, qytetarja Alena Gashi ngriti shqetësimin për pagat dhe kushtet e tyre të punës, duke kërkuar më shumë dinjitet dhe mbështetje për këtë kategori punëtorësh.

“Punëtorët janë duke e mirëmbajtur shumë Kamenicën, por ju si kryetar nuk jeni duke u dalë hakut. Pagat nuk janë sa duhet për punën që bëjnë. Ata kanë familje e fëmijë dhe meritojnë paga më të dinjitetshme,” ka shkruar ajo ndër të tjera.

Ajo gjithashtu theksoi se punëtorët shpesh angazhohen edhe në terrene të tjera dhe përballen me ngarkesa të mëdha fizike, ndërsa kërkoi që pagat e tyre të jenë mbi 500 euro, duke apeluar për më shumë përgjegjësi institucionale dhe njerëzore ndaj tyre.

Komentet e tilla pasqyrojnë pakënaqësinë e një pjese të qytetarëve lidhur me trajtimin e punëtorëve të sektorit publik lokal, të cilët konsiderohen si ndër shtyllat kryesore të funksionimit dhe mirëmbajtjes së qytetit./rajonipress/