Qosja: Lubonja mbështet miqtë e Serbisë

Profesor Rexhep Qosja i përgjigjet Fatos Lubonjës , pas akuzave që ky i fundit pati bërë për Ramush Haradinajn e udhëheqësit e UÇK-së në tërësi.

“E preceptoj Lubonjën si intelektual modern që si pakkush tjetër bën demitizimin e historisë dhe politikës. Por, në prirjen demitizuese të tij shoh një gabim:mbështetjen, kur më të paktë e kur më të madhe , në gjykimet e të huajve, para së gjithash të disa studiueseve publicistëve evropianë-francezë, gjermanë , grekë, italianë atë tjerë, që në të vërtetë janë miq të hapët a të fshehtë të Serbisë”, shprehet akademiku.

Qosja nënvizon se Ramush Haradinaj u shpall i pafajshëm nga Gjykata Ndërkombëtare e Hagës, e kjo nuk duhej harruar assesi prej publicistit.

“Me atë rast Fatos Lubonja harroi se Ramush Haradinaj dhe gjithë pjesëtarët e Ushtrisë Çlirimtare të Kosovës kanë bërë luftë çlirimtare, kanë mbrojtur familjet e veta, token e vet, atdheun e vet-Kosovën, popullin e vet prej një pushtuesi, i cili pas një dhune terrori shumëvjeçar ndaj shqiptarëve , deshi ta pastronte Kosovën prej tyre dhe deshi ta pastronte duke përdorur mjetet shfarosëse që prej institucioneve juridike ndërkombëtare janë shpallur të palejueshme. Domethënë të dënueshme. Siç dihet çlirimtarët mbrojnë qenien e popullit të vet prej pushtuesit, prandaj lufta e tyre nuk është zhvlerësuar dhe nuk është ndëshkuar. Ajo është luftë e drejtë e arsyeshme, e moralshme”,thekson akademiku.

Lubonja në një shkrim për revistën “Sudosteuropa Mittelungen” e ka cilësuar Haradinajn një vrasës që u lirua nga Haga pas zhdukjes dhe ekzekutimit të dëshmitarëve.

Se çfarë duhet të bënin ndryshe politikanët në zgjedhjet e fundit në Kosovë, akademiku shprehet:

Nuk është e pranueshme , nuk nënkupton shije e kulturë, fjala vjen, që kryetarja e Kosovës së varfër të vishet nëntë herë më shtrenjtë se kancelarja modeste e Gjermanisë së pasur, Angela Merkel, dhe pesë herë më shtrenjtë se ish-sekretarja shtetërore e SHBA-ve Hilari Klinton”,pohon ai.