Londër – Qitësi nga Australia, Russell Mark, ka arritur në Britani të Madhe shumë i nervozuar, pasi atij i është kumtuar lajmi se nuk do të lejohet të flejë me gruan e tij gjatë Lojërave Olimpike “Londra 2012”.
Mark dhe gruaja e tij Lauryn, janë pjesë e ekipit të shenjëtarisë që do të paraqiten në Londër. Mirëpo, me të arritur në Fshatin Olimpik, ata duhet të qëndrojnë larg njëri-tjetrit dhe janë vendosur në dhoma të ndara. Kjo ndarje e çiftit Russell, do të jetë në fuqi deri më 12 gusht kur edhe zyrtarisht mbyllet Olimpiada “Londra 2012”.
Mark 48-vjeçar, i cili merr pjesë në Olimpiadën e gjashtë, ka thënë se ky “dënim” për çiftin ka ardhur me insistimin e zyrtarëve të Komitetit Olimpik të Australisë. Sipas tij, kjo ka ndodhur pasi gruaja e tij, Lauryn kohët e fundit është paraqitur në ballinën e revistës “Zoo” të meshkujve. Lauryn është fotografuar me një pushkë në shpinë dhe mbante veshur vetëm bikini.
Mark thotë se ai dhe gruaja e tij janë dënuar pasi janë çift i martuar .
