​Qeveria Thaçi , 5 milion euro borxh arsimtarëve

Qeveria e Kryeministrit Hashim Thaçi i pati premtuar arsimtarëve kosovar rritje pagash prej 50 % që në vitin 2011. Pagat për dy muajt e parë nuk dualën me rritje dhe rritja filloi vetëm në muajin mars të atij viti. Rrjedhimisht, Qeveria Thaçi II u mbeti arsimtarëve mbi 5 milionë euro borxh për ata dy muaj, dhe që sipas gazetës “Zëri”, ai borxh ende nuk është shlyer.

Kanë kaluar dy vite, por drejtuesit e sindikatave të arsimtarëve thonë që do të vazhdojnë t’ia kërkojnë këtë borxh Qeverisë, pasi që ai vendim për rritje pagash prej janarit të viti 2011 kurrë nuk është shfuqizuar, edhe pse paratë kurrë nuk dualën në xhirollogaritë e arsimtarëve.

Megjithëse borxhi i vjetër i kësaj qeverie nuk është shlyer, Kryeministri Hashim Thaçi edhe në fushatën e fundit elektorale për zgjedhjet lokale premtoi rritje pagash për arsimtarët, gjë që si mundësi po kontestohet nga opozita dhe ekonomistët.