Qeveria ka shpenzuar 1 miliard e 277 milionë euro nga fillimi i këtij viti deri në fundin e muajit nëntor. Shpenzimet më të larta janë realizuar në investime kapitale duke arritur në vlerën prej 459 milionë eurove.
Në buxhetin e vitit 2012, shpenzimet për investime kapitale ishin planifikuar të arrijnë në 624 milionë euro deri në përmbylljen fiskal të vitit.
Bazuar në raportin e përkohshëm të shpenzimeve të publikuar nga Ministria e Financave, shpenzimet për investime kapitale janë të shpërndara në muajt e gjysmës së dytë të vitit, mesatarisht nga 50 milionë euro për muaj, shkruan “Koha Ditore”.
Zyrtar të ministrisë i kanë thënë gazetës se shifrat e paraqitura në raportin e përkohshëm janë të bazuara në gjendjen reale mbi shpenzimet financiare, dhe si të tilla nuk janë të detajizuara për shkak të formatit të raportit.
