Qeveria po merr “hua” për t’i shlyer borxhet

Prishtinë – Qeveria e ka tejkaluar planin për hyrje në borxhe të brendshme nëpërmjet shitjes së letrave me vlerë ani pse niveli i borxhit ishte i rregulluar me Ligjin e buxhetit të aprovuar në Kuvend.

Sipas planit të paraqitur në buxhetin vjetor, Ministria e Financave obligohej që të kryente shërbimet për Qeverinë për marrje hua nga sektori privat i brendshëm 74 milionë euro nëpërmjet letrave me vlerë. Por, nga nëntë ankande të letrave me vlerë të zhvilluara deri në gjysmën e muajit gusht, kjo ministri ka përfituar rreth 99 milionë euro të hyra, apo 25 milionë më tepër sesa plani buxhetor, shkruan sot Koha Ditore.

Sipas gazetës, të njëjtat borxhe, sipas dokumentacioneve mbi shpalljen e rezultateve, Qeveria obligohet t’ua kthejë blerësve të aksioneve të “TRUST”-it me normë vjetore të interesit nga 2 deri në rreth 5 për qind.

Për tejkalimin e pragut për borxhin e brendshëm Ministria nuk i ka ndryshuar planet as në rishikimin e buxhetit të realizuar në muajin qershor. Sipas këtij dokumenti të aprovuar në Kuvend dhe që ka fuqinë e Ligjit, borxhi i brendshëm vjetor nuk llogaritej të kalonte mbi 74 milionë euro.