Qeveria dhe opozita kanë të meta

Sociologu dhe njohësi i rrethanave politike, Fadil Maloku, i ka kritikuar pozitën dhe opozitën për gjendjen në të cilën e kanë sjellë vendin.Ai ka thënë se të dyja palët kanë të meta, duke u bërë thirrje të ulen në tavolinë dhe të gjejnë një zgjidhje.

Në këtë intervistë për “Epokën e re” ai ka vlerësuar se shkuarja e menjëhershme në zgjedhje të reja, siç po pretendon opozita, mund t’i kthehet bumerang kësaj të fundit. “Nuk shoh zgjidhje as në këmbënguljen e opozitës për zgjedhje të reja. Mendoj se kalkulimet e saj për zgjedhje të parakohshme, pa ndryshimin e ligjit aktual zgjedhor, pa plotësimin e agjendës animuese me elemente të tjera të reja, që vërtet do ta rizgjonin interesin e qytetarëve, pa një platformë decidive të përpunuar hollësisht, pra pa një program të qartë qeverisës, do të ishte një tjetër vetëvrasje e mundimshme që edhe mund t’i kthehet si bumerang”, ka thënë Maloku.

Ai ka bërë me dije se Qeveria është ajo e cila duhet të reflektojë karshi situatës politike, duke mos hezituar t’i diskutojë çështjet që i ka ngrehur opozita. “Padyshim sërish reflektimi do të duhej të vinte nga ‘qeveria e elefantëve’. Kjo është një rregull e pashkruar për situata të tilla, kur vendi ka krizë legjitimiteti dhe krizë legaliteti të pushtetit. Mos të harrojmë se janë mbledhur 200 mijë nënshkrime të qytetarëve, pastaj demonstrimi i dhjetëra mijëra qytetarëve më 9 janar, një qeveri serioze dhe legale, do të duhej të reflektonte dhe t’i takonte opozitarët e vendit të vet”, është shprehur ai, duke kritikuar refuzimin e Qeverisës për të biseduar me opozitën për Demarkacionin dhe Asociacionin. Sipas tij, as subjektet politike opozitare në këtë mënyrë nuk mund t’i arrijnë qëllimet e tyre politike. “Qytetaria është e vetmja shpresë, e cila ende nuk e ka tretur veten në ‘kurthet’ e të dyja palëve. Kjo masë kritike mund t’i bëjë ndryshimet e duhura evolutive. Pra, duke katapultuar si fytyra, si subjekte të reja politike, që nuk vuajnë as nga hipotekat e ‘paqes’, as të ‘luftës’. Pse jo?! Për mendimin tim, zgjidhja do të ishte kjo”, ka thënë Maloku.

“Epoka e re”: Pozita dhe opozita as këtë vit nuk i kanë ndryshuar qëndrimet e tyre. Si njohës i rrethanave politike, a ka shpresa mos të përsëriten këtë vit skenat e opozitës të vitit të kaluar?

Maloku: Për mendimin tim, gjasat janë minimale, pasi janë tejkaluar limitet e intervenimit. Të dy taborët po duket se nuk e kanë ndërmend të lëshojnë pe. Për mendimin tim, e logjikshme do të ishte që Qeveria t’i japë alternativat në kërkesat e opozitës ashtu si veprohet zakonisht në të gjithë botën e civilizuar. Bile aq më shumë kur kjo Qeveri veten po e trajton si “qeveri elefantësh”.