Qamil Rexhepi: Do të jem afër qytetarit për t`i realizuar kërkesat e tyre pa anime politike

Gjilan – Qamil Rexhepi është kandidatë për këshilltar komunal nga radhët e LDK-së, Rexhepi jo rastësisht është gjendur në listën për këshilltar komunal meqë për bazë është marrë aktiviteti dhe puna e tij kahershme. Thotë se ka një përvojë të mirë dhe të qëndrueshme dhe kombëtare edhe profesionale për t`i hyrë dhe fituar këtë garë. Qëllimi, synimi dhe objektivi im si kandidat është zëri im i fuqishëm për realizimin e mirëqenies më të mirë të qytetarëve të Gjilanit, dhe për ndryshime pozitive në favor dhe për një jetë ma të mirë për qytetarin e Gjilanit. Do të jem afër qytetarit për t`i realizuar kërkesat e tyre pa anime politike, kjo është më e rëndësishmja për mua thotë Rexhepi për rajonipress.

Qamil Rexhepi ka nisur të merret qysh në moshë të re me problemet politike dhe me aktivitetet e ndryshme edhe ilegale në kohën e ujërave të turbullta. Shpesh është persekutuar e dënuar për këto aktivitete kombëtare.

“Aktiviteti im personal ka filluar qysh herët në moshën rinore edhe në ndërrime të sistemeve kurrë pa u ndal, në fillim si i ri gjatë viteve 80-ta dhe viteve 90-ta për qeshtjen kombëtare, vitet 2000 e këndej jam angazhuar duke punuar e kontribuar për një mirëqenie më të mirë për qytetarin e vendit ton. Pjesëmarrës i demonstratave të vitit 81 si nxënës që isha në moshën 16-17 vjeç, bashkë me Agim Ramadanin, Shukrijen e shumë nxënës tjerë. Në shkurt të vitit 1982 UDB-ja e asaj kohe me nxori nga klasa dhe më futi në paraburgim një natë e një ditë pas gjithë maltretimeve që ushtruan në mua si një i ri ende shtalb dhe nuk nxorën gjë nga unë, mu deshtë të shtrihem në spitalin e Gjilanit për trajtim mjekësor….nuk pushova me aktivitete ilegale deri në vitet e 90-ta” shprehet Rexhepi.

Po cila është historia e Qamil Rexhepit me LDK. “Isha njëri ndër të parët dhe më i riu në këshillin iniciues për formimin e lidhjes Demokratike të Kosovës në nëndegën e Pogragjës ku e rrezuam LSPP të asaj kohe e të atij sistemi monist, aktivitetin tim nuk e ndala kurrë deri sot. Tani kam pas edhe disa poste udhëheqëse vitet e fundit, kryetar i nëndegës nga viti 2010-2014, nga viti 2014 Kryetar këshilli i fshatit u zgjodha me votën e qytetarëve të fshatit, si kryetar i KL u angazhova për disa projekte të rëndësishme për fshatin, si në asfaltimin e rrugës Pogragjë – Gjilan, përmirësimin e ujësjellësit, mbulimin e qind për qind të ndriçimit publik, sanimin e objektit të ambulantes së fshatit, rregullimin e rrugëve të arave të shtruara me zhavor, asfaltimin e 14 lagjeve nëpër fshat, këto projekte janë të realizuara me kërkesë nga unë si kryetar i këshillit po edhe shumë kërkesa tjera që i kam dërguar në zyrën e Kryetarit dhe zyret e drejtorive komunale. Kam dërguar edhe kërkesa po edhe shumë here kam ngrit zërin për investime edhe në fshatrat, si Bilinicë, Sllubicë e Stubline etj. Tash jam i nominuar për këshilltar komunal me nr. 19 nga nëndega e LDK-së të fshatit Pogragjë, hera e parë është qe sa vite që nëndega e nominon një kandidat që jeton dhe vepron në nëndegë të Pogragjës” shton Rexhepi.

Qamil Rexhepi ka edhe formulën e tij pse hyri për kandidatë për këshilltar komunal. “Qëllimi, synimi dhe objektivi im si kandidat është zëri im i fuqishëm për realizimin e mirëqenies më të mirë të qytetarëve të Gjilanit, dhe për ndryshime pozitive në favor dhe për një jetë ma të mirë për qytetarin e Gjilanit. Do të jem afër qytetarit për t`i realizuar kërkesat e tyre pa anime politike, kjo është më e rëndësishmja për mua” tha ai./rajonipress/