“Provokohen” zgjedhjet e parakohshme

Diskutimet e zyrtarëve të lartë të Partisë Demokratike të Kosovës për mundësinë e futjes së vendit në zgjedhje të parakohshme këtë vit, kanë mobilizuar partitë opozitare në vend që shpallja e mundshme e tyre mos t’i zërë të papërgatitura.

Zyrtarë të lartë të PDK-së që janë në Qeveri, kanë diskutuar ditët e fundit për këtë ide dhe besojnë se ideja e tyre do të realizohet qoftë përmes krizës institucionale, përmes dërgimit të presidentes Atifete Jahjaga në Gjykatën Kushtetuese, qoftë përmes lejimit të votëbesimit të Qeverisë sikur në vitin 2010.

Një zyrtar i lartë i PDK-së në Qeveri i ka treguar “Tribunës” me kusht anonimiteti, se PDK-ja, pavarësisht rrethanave, nuk do të hyjë në zgjedhje pa e përfunduar reformën zgjedhore. “Prandaj takimet për reformën zgjedhore tani do të intensifikohen dhe ky proces do të kryhet shpejt. Sfida më e madhe për ta përmbyllur këtë proces na mbetet kushtëzimi i komuniteteve pakicë për vendet e rezervuara, ngase këtë ata po na kushtëzojnë me ndryshimet kushtetuese, por besojmë se një zgjidhje do të bëhet edhe në këtë çështje.

Ideja jonë është që zgjedhjet e parakohshme parlamentare të bëhen përnjëherë me zgjedhjet lokale”, ka treguar zyrtari i lartë i partisë së kryeministrit Hashim Thaçi.(Tribuna)